![](https://albanianpost.com/wp-content/uploads/2023/10/AGK.jpg)
Asociacioni i Gazetarëve të Kosovës (AGK), e ka dënuar fushatën denigrueses të disa deputetëve të Lëvizjes Vetëvendosje (LVV), ndaj dy mediave online në vend: “Periskopit” dhe “Nacionales”.
Ky reagim i AGK-së, ka ardhur pasi që deputetët e VV-së, Sali Zyba dhe Dimal Basha, kanë shpërndarë një artikull të një mediumi boshnjak “Slobodna Bosna”, në të cilën akuzohen këto media se janë nën “kontroll” të Serbisë dhe presidentit të saj Aleksandër Vuçiç.
Prandaj, AGK-ja ka denoncuar fushatën e rrezikshme akuzuese të deputetëve të VV-së, duke theksuar se janë të alarmuar me këtë fushatë të re të partisë në pushtet kundër mediave.
Deputeti Zyba në një status në Facebook shkroi se “dy medie të Kosovës iu përmendën emra, Periskopit dhe Nacionales”.
Të dy deputetët, dhe eksponentë të tjerë të Vetëvendosjes kanë shpërndarë një artikull të publikuar në faqen online të Transmetuesit Publik, RTK, që pa autor, ka përkthyer tekstin e mediumit boshnjak.
Shkrimi i ‘Slobodna Bosna’, bazohet në burime dhe në deklaratat e një individi kontrovers, me emrin Boban Bogdanoviç, që thotë se është disident politik serb.
“AGK-ja, dënon fuqishëm këtë fushatë të rrezikshme dhe të papranueshme të deputetëve të partisë qeverisëse, Vetëvendosje, që i targeton këto dy mediume dhe gazetarët që punojnë aty”, thuhet në reagim.
Fushata si kjo, sipas AGK-së, e rrezikojnë seriozisht sigurinë e gazetarëve të këtyre dy mediumeve, dhe Vetëvendosja e deputetët e saj “duhet të mbahen përgjegjës për nxitjen e urrejtjes dhe sulmeve potenciale kundër tyre”.
Nga kjo organizatë i kanë bërë thirrje kryeministrit Albin Kurti dhe VV-së, që të mos angazhohen në fushata të tilla të papranueshme, që kanë për qëllim frikësimin e gazetarëve në Kosovë për të bërë punën e tyre.
AGK-ja, gjithashtu shpreh keqardhje që një “lajm”, si ky që sulmon kolegët, ka gjetur hapësirë edhe në Lajmet Qendrore të Televizionit Publik të Kosovës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com