Më ra halli që duhet ta përfundoj këtë shkrim-polemike me FFK, por ja që përballja me të korruptuar, gënjeshtarë, e mediokër si ju, është pjesë e detyrës.

Çfarë shfaqjeje madhështore kemi sot! Federata e Futbollit të Kosovës ka vendosur të shpërndajë një “epikë” tragjikomike, ku në vend që të adresojë krizën e vërtetë brenda futbollit kosovar, zgjedh të shpikë një grup kriminal imagjinar dhe të shpallë Baton Haxhiun si kryearmikun e Federatës. Thua të jenë duke filmuar ndonjë serial të ri?

Sipas tyre, qenka një “grup i strukturuar kriminal” që, si duket, ka në objektiv “kapjen” e FFK-së. Pra, nuk është korrupsioni, nepotizmi, as mungesa e zhvillimit të infrastrukturës që po shkatërron futbollin kosovar, por shkrimet dhe lajmet e Albanian Post-it!

Të imagjinosh që një Federatë e tërë, me gjithë drejtuesit e saj “të ndritur”, paska frikë nga disa artikuj të një gazete, është komedi në vetvete.

A thua të ketë FFK-ja ndonjë përgjigje për pyetjet thelbësore? Për shembull, ku shkuan fondet e UEFA-s për zhvillimin e futbollit? Pse stadiumet mbeten si në kohën e mesjetës? Apo mos ndoshta Baton Haxhiu dhe “pseudo-gazetarët” janë edhe fajtorët për gropat në fushat e lojës?

Shpikja e një “super armiku”

Të lexosh deklaratën e FFK-së, është sikur të përjetosh një film të vjetër të një sekte hajnash si në një familje siciliane.

Në mungesë të armiqve të vërtetë, ata krijojnë një “super armik të jashtëm”, i cili për një arsye të paqartë paska vendosur të rrëzojë fuqinë mitike të FFK-së. Dhe kush është ky armik? Baton Haxhiu!

Po, Unë Baton Haxhiu, paskam fuqinë që të çoj në kaos një Federatë të tërë futbolli me vetëm disa kolumna.

Dhe ku tjetër mund të kërkojmë përgjigje për dështimet e FFK-së, përveçse te ky “grup kriminal” i sajuar? Thua që unë Baton Haxhiu përgatita terrenet e këqija të lojës, apo isha ai, i cili rekrutonte njerëzit për të menaxhuar Federatën me mentalitetin e feudalëve të mesjetës? Kjo do të ishte e qartë, përveç faktit që është komplet absurde!

Tregimi i një historie heroike” të shpifur

Federata pretendon se po mbron “vlerat e larta të futbollit kosovar” nga një grup i strukturuar që paska marrë për shembull rastin e inceneratorëve në Shqipëri. Kjo analogji është aq qesharake, saqë nuk dihet a të qeshësh apo të ndjesh keqardhje. Po cilat janë këto “vlera” që po mbrojnë? Manipulimi i klubeve, shantazhimi i lojtarëve dhe mbushja e xhepave të tyre nga fondet që duhet të shkonin për zhvillimin e futbollit?

Në vend që të adresojnë shqetësimet e ngritura nga media dhe nga qytetarët e Kosovës, ata zgjedhin të bëjnë “trimërinë e tyre” duke sulmuar gazetarët, të cilët thjesht po ekspozojnë atë që çdo tifoz futbolli tashmë e di: FFK-ja është bërë një bunker i korrupsionit dhe paaftësisë.

Një federatë që po mbyt veten

Nëse do të ndiqnim logjikën e FFK-së, do të mendonim se gjithçka në futbollin kosovar është në rregull. Klubet janë të lumtura, lojtarët janë në kushte të shkëlqyera dhe fusha e blertë duket si një parajsë. Por në të vërtetë, çdo tifoz që ka ndjekur një ndeshje në Kosovë e di realitetin. Federata e Futbollit të Kosovës është më shumë një teatër absurd, se sa një institucion sportiv. Dhe si çdo teatër absurd, shpeshherë personazhet humbasin në fiksionin e tyre, pa e kuptuar që publiku qesh me ta, jo me skenarin që ata mendojnë se kanë shkruar.

Ironia është se në vend që të përballen me faktet – me korrupsionin e dokumentuar, me akuzat e ngritura, me paaftësinë e tyre për të zhvilluar futbollin kosovar – ata zgjedhin të sulmojnë gazetarinë dhe të krijojnë një dramë fiktive për të devijuar vëmendjen. Kjo sjellje nuk është e re. Në fakt, federatat e korruptuara në mbarë botën kanë ndjekur të njëjtën recetë: fajëso kritikët, shpik një armik të jashtëm dhe vazhdo me abuzimet e tua të përditshme.

Të refuzosh të përballesh me realitetin

FFK-ja ka zgjedhur rrugën më të lehtë: shpif, sulmo dhe krijo skenarë konspirativë. Në mungesë të argumenteve dhe rezultateve konkrete, ata shpikën skena komike me “armiq të jashtëm”, që po tentojnë të rrëzojnë “kështjellën e futbollit”. E vërteta është se kjo “kështjellë” është ndërtuar mbi themele të kalbura dhe nuk ka nevojë për asnjë armik të jashtëm për t’u rrëzuar – ajo po bie vetë.

Në fund të ditës, futbolli kosovar nuk do të zhvillohet me retorikë boshe, me deklarata teatrale dhe me sulme ndaj atyre që guxojnë të thonë të vërtetën. Zhvillimi vjen me punë të ndershme, me transparencë dhe me një Federatë që në vend që të sillet si një grup feudalësh të frikësuar, t’i kthejë tifozëve dhe lojtarëve atë që meritojnë: një futboll të lirë nga korrupsioni dhe paaftësia.

Federata na paraqet një reagim – “triller absurd” – ku në mungesë të një strategjie të mirëfilltë, shpikin një grup “kriminal” që paska si qëllim rrëzimin e tyre. Kjo tingëllon më shumë si një përrallë e shkruar nga “skllavopronarët modernë të fushave të futbollit”, se sa një deklaratë serioze nga një institucion që pretendon të udhëheqë futbollin në një vend. Në vend që të marrin përgjegjësi për situatën katastrofike të futbollit kosovar, ata na ofrojnë një shfaqje, ku roli kryesor u takon një grupi mediash që gjoja po komplotojnë kundër tyre.

Por, “sa gjatë mund të zgjatë kjo lojë e shpifur?

Problemet e vërteta të FFK-së janë të dukshme për të gjithë. Lojtarët, tifozët, dhe qytetarët e Kosovës e dinë shumë mirë që futbolli kosovar nuk po dështon për shkak të ndonjë komploti të jashtëm. Ky është një problem i brendshëm, i krijuar dhe i ushqyer nga ata që kanë për detyrë të udhëheqin futbollin dhe ta çojnë përpara.

Pas gjithë kësaj shfaqjeje qesharake, ndoshta ia vlen të ndalemi një moment dhe të bëjmë një “analizë serioze”. FFK-ja ka një mori problemesh strukturore, që duhet t’i adresojë urgjentisht, dhe ato nuk kanë asnjë lidhje me Baton Haxhiun apo Albanian Post-in. Problemet e vërteta janë:

-Korrupsioni i brendshëm: Akuzat për abuzime me fondet e UEFA-s dhe FIFA-s janë të njohura dhe po përhapen gjithnjë e më shumë. Fondet që duhej të shkonin për zhvillimin e infrastrukturës së futbollit janë përdorur për qëllime private dhe klienteliste.

-Mungesa e infrastrukturës: Nëse një skuadër e huaj vjen të luajë në Kosovë, do të përballet me fusha që nuk janë as afër standardeve ndërkombëtare. Një vend që ka prodhuar lojtarë të nivelit të lartë për ekipe të njohura evropiane, nuk arrin të ofrojë fusha të denja për brezin e ri të lojtarëve.

-Manipulimi i klubeve dhe presionet ndaj lojtarëve: Raportet për shantazhe dhe kërcënime brenda federatës janë të shumta. Lojtarët dhe klubet shpesh nuk guxojnë të flasin hapur, nga frika e ndëshkimit ose përjashtimit. Ky sistem feudal i mbajtjes së pushtetit ka frenuar çdo përpjekje për përmirësim dhe reformë.

-Kapja e institucioneve sportive: Federata duket më shumë si një instrument politik, se sa një organ sportiv. Drejtuesit e saj janë të lidhur me interesa të ngushta personale dhe të klientelizmave që pengojnë çdo lloj transparence apo reforme të vërtetë.

Nëse vërtet duam të flasim për të ardhmen e futbollit kosovar, duhet të ndalim këtë teatër absurd dhe të fillojmë nga e vërteta. Futbolli ynë nuk mund të vazhdojë të mbahet peng nga disa individë që, në vend që të zhvillojnë lojën, janë të zënë duke shpikur armiq të jashtëm dhe duke sulmuar gazetarët që guxojnë të thonë të vërtetën.

Futbolli ynë ka nevojë për udhëheqës të ndershëm, që e kuptojnë se zhvillimi i sportit nuk bëhet me fjalë boshe, por me punë të vërtetë dhe të përkushtuar. Ka ardhur koha që FFK-ja të marrë përgjegjësi për dështimet e veta dhe të ndalë së fshehuri pas trillimeve komike. Ky është momenti për një “reformë të thellë”, që futbolli ynë të shkëlqejë në fushën që meriton dhe jo të ngecë në batakun e korrupsionit dhe paaftësisë.

Por mos u shqetësoni, dorën në zemër as nuk duhet të merremi shumë seriozisht me ju dhe me komunikatën tuaj.

Në fund të fundit, letra juaj ka qenë një demonstrim klasik i mediokritetit. Me stilin e saj të dobët dhe pa thelb, duket se ju keni më shumë problem me shkrimin, se sa me të vërtetën. Nëse nuk dini as si të përgjigjeni denjësisht ndaj kritikave legjitime, çfarë tjetër mund të pritet nga një grup që është më i zënë duke nxjerrë nga dritaret kryetarin tuaj per te ikur nga policia, i cili duhej të ishte në qeli?

Nëse është Agim Ademi, që e nxirrni nga burgu për në spital, nuk është ai një tjetër që e largoni në errësirë, kur duhet të ishte i pari që përballet me drejtësinë.

P.S. Për zotërinjtë e “ndershëm” si Taulant Hodaj, nuk e kisha degjuar as si emër në jetën time, që përfaqëson njëkohësisht Federatën si Sekretar i Përgjithshëm dhe e mbron atë si avokat, duhet thënë se kjo është një arritje e vërtetë në artin e konfliktit të interesit.

Një korrupsion me dy fytyra: një dorë firmos pagën nga FFK, ndërsa tjetra mbledh paratë si avokat privat. Ky është një nivel i ri turpi institucional, ku integriteti dhe etika profesionale janë thjesht terma për t’u hedhur poshtë.

Në çdo vend tjetër serioz, ky abuzim i hapur do të ishte përndjekur nga drejtësia, por në FFK, duket se përfitimet vetjake janë të vetmet rregulla të lojës.