Administrata amerikane nis programin e ri për refugjatët afganë

Një zyrtar nga administrata e presidentit amerikan Joe Biden, të hënën e 2 gushtit, ka njoftuar se do të nisë një program i ri për të vendosur disa afganë si refugjatë në Shtetet e Bashkuara.

Agjencia ndërkombëtare e lajmeve “Reuters” bëri me dije se Departamenti Amerikan i Shtetit pritet të njoftojë gjatë kësaj dite krijimin e të ashtuquajturit program refugjatësh “Priority Two”.

Ky program vjen në një kohë që përplasjet në Afganistan po rriten, me talebanët, të cilët kërkojnë të kapin kryeqytetet kryesore provinciale.

Biden është përballur me presion nga ligjvënësit dhe grupet e mbrojtjes për t’i ndihmuar afganët, të cilët janë të rrezikuar nga hakmarrja e talebanëve – për shkak të lidhjes së tyre me SHBA-të gjatë luftës 20-vjeçare amerikane.

Zyrtari i administratës tha se programi i ri i refugjatëve do t’i mbulojë afganët që do të merren me projekte të financuara nga SHBA-të dhe organet joqeveritare.

Programi i Vizës Speciale të Imigrimit (SIV) përfshin ata afganë, të cilët kanë punuar si përkthyes dhe të tjerët që kanë punuar për qeverinë amerikane dhe familjet e tyre.

Rreth 200 aplikantë të SIV, vizat e të cilëve janë në fazat përfundimtare të përpunimit dhe anëtarët e familjes fluturuan drejt SHBA-ve javën e kaluar në fillim të një përpjekjeje evakuimi të quajtur “Operacioni i Aleatëve Refugjatë” që mund të përfshijë deri në 50 mijë njerëz ose më shumë.

Ata u dërguan për të qëndruar në një bazë ushtarake në Virginia, për të përfunduar procedurat formale para se të zhvendoseshin në të gjithë vendin.

Më tej, zyrtari i administratës ka deklaruar se programi i ri për afganët do të ndryshonte nga një program i refugjatëve “Prority Two” për irakianët, që iu është pezulluar për një kohë të pacaktuar – ndërsa zyrtarët amerikanë po ndjekin një hetim gjithëpërfshirës të mashtrimit.

Ndërkohë, sipas zyrtarit, programi i ri afgan do të kërkojë që aplikantët të referohen tek agjencitë amerikane, zyrtarë të lartë amerikanë, organe joqeveritare ose media.

Kërkesa e referimit është një ndryshim kryesor midis programit të ri afgan dhe programit irakian. Ky i fundit i lejon irakianët të aplikojnë drejtpërdrejt pa referim, e mbylli zyrtari.

E gjithë nisma ka ardhur për shkak të urdhrit të Biden, për të tërhequr trupat amerikane dhe atyre të NATO-s, nga Afganistani pas 20 vitesh luftë.

Nga ana tjetër, talebanët pas largimit të trupave të huaj talebanët kanë marrë disa provinca kryesore afgane.

Misioni i SHBA-ve në Afganistan

Presidenti Biden, të enjten e 8 korrikut, tha se misioni ushtarak amerikan në Afganistan do të përfundojë më 31 gusht.

“Ne nuk shkuam në Afganistan për të ndërtuar kombe”, tha Biden, në një fjalim për të azhurnuar përpjekjet e vazhdueshme të administratës së tij për të përfunduar luftën e SHBA-ve në Afganistan.

“Udhëheqësit afganë duhet të bashkohen dhe të drejtojnë drejt një të ardhmeje”.

Biden, gjithashtu, plotësoi arsyetimin e vendimit të tij për t’u dhënë fund operacioneve ushtarake amerikane edhe kur talebanët bëjnë përparime të shpejta në pjesë të konsiderueshme të vendit.

Tërheqja e trupave

Megjithëse SHBA-të nuk e përmbushën afatin e tërheqjes së 1 majit të rënë dakord në bisedimet me talebanët vitin e kaluar, tërheqja e tyre ka filluar.

Biden njoftoi se të gjitha trupat do të tërhiqen deri më 11 shtator. Kritikët e vendimit për tërheqjen thonë se militantët do të përpiqen të futen përsëri në pushtet.

Forcat Afgane të Sigurisë kishin filluar sulmet ajrore dhe kishin vendosur forcat elitare komando në zonë.

Lufta me talebanët

Dalja përfundimtare e forcave të huaja vjen në mes të një rritjeje të luftimeve midis luftëtarëve talebanë dhe forcave afgane në disa provinca.

Në fillim të këtij muaji, sekretari i Përgjithshëm i NATO-s, Jens Stoltenberg, tha se aleanca ishte “duke kërkuar se si mund të sigurojmë trajnime jashtë vendit për Forcat e Sigurisë Afgane, veçanërisht Forcat e Operacioneve Speciale”.

Katari, një shtet i Gjirit, ka qenë shtëpia politike e talebanëve që nga viti 2013.

Në vitet e fundit, ky ka qenë vendi, ku përfaqësuesit e autorizuar të grupit kryengritës kanë zhvilluar bisedime me zyrtarë amerikanë, përfaqësues të NATO-s, ndërkombëtarë grupet e të drejtave dhe zyrtarët e qeverisë afgane.

Shtetet e Bashkuara të Amerikës, Britania dhe Turqia ishin midis vendeve të NATO-s, të gatshme për të dërguar forca që të trajnojnë afganët në Katar.

Një zëdhënës i talebanëve ka deklaruar se grupi nuk ishte në dijeni për planin e NATO-s.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.