Abdixhiku: Zgjedhjet të mbahen më 26 janar, vendit i duhet një Qeveri që e parandalon zhbërjen e shtetit

Kryetari i Lidhjes Demokratike të Kosovës, Lumir Abdixhiku, pas takimit me presidenten e Kosovës, Vjosa Osmani, ka thënë se ka propozuar që zgjedhjet nacionale të mbahen më 26 janar të vitit 2025, teksa ka theksuar se vendit i duhet sa më shpejt një Qeveri e re.

“Meqë, sipas përcaktimeve të afateve kushtetuese, në dispozicion na u ofruan katër data, ato të 26 janarit, 2 shkurtit, 9 shkurtit e 16 shkurtit; dhe në vijë me bindjet politike të Lidhjes Demokratike – se vendit i duhet sa më parë një Qeveri e re, që parandalon zhbërjen e shtetit, shëron polarizimin shoqëror, rikthen orientimin pro-perëndimor e fokusohet në zhvillim e mirëqenie qytetare, propozova datën 26 janar 2025 si datë të zgjedhjeve të ardhshme”, shkroi ai në Facebook.

Deputeti i LDK-së ka potencuar se zgjedhjet për LDK-në janë gjithmonë festë dhe si manifestim i demokracisë, si rikthim tek qytetari, si vlerë e shtetit ri, “ato na vijnë në një moment kritik të vendit, të gjeneratave të tashme dhe atyre që vijnë”.

Ngjashëm si kreu i LDK-së edhe kryetari i Partisë Demokratike të Kosovës, Memli Krasniqi dhe ai Aleancës për Ardhmërinë e Kosovës, Ramush Haradinaj, kanë propozuar që zgjedhjet e reja parlamentare të mbahen më 26 janar 2025.

Ndërkaq presidentja e Kosovës, Vjosa Osmani, ka theksuar se gjatë takimit me krerët e partive politike parlamentare janë pajtuar që të bëhet analizimi i të gjitha datave dhe elementeve përkatëse për mbajtjen e zgjedhjeve të rregullta parlamentare.

Në bazë të Ligjit për Zgjedhjet e Përgjithshme në Kosovë, cikli i ri elektoral më së afërmi do të mund të mbahet më 26 janar ndërsa më së voni më 16 shkurt 2025, përkatësisht 30 ditë para përfundimit të mandatit të deputetëve të Kuvendit të Kosovës i fituar nga zgjedhjet e 14 shkurtit të vitit 2021.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.