Abdixhiku: Për çdo ditë pune për tre vjet, qeveria dha nga një tender sekret – plot 209 milion euro

Kryetari i Lidhjes Demokratike të Kosovës (LDK), Lumir Abdixhiku, nëpërmjet një postimi në “Facebook” të enjten, akuzoi partinë në pushtet se për çdo ditë pune për tre vjet qeverisje dha nga një “tender sekret” që nëse llogaritet mesatarisht, do të thotë rreth 209 milion euro për vetëm tri vjet.

“Në mesatare, për çdo ditë pune për tre vjet, është dhënë nga një tender sekret. 781 tenderë sekret, plot 209 milion euro për vetëm tri vjet. Nga fusha e IT-së, deri tek energjetika, tenderët njëburimorë janë bërë zakonshmëri. Këto janë disa nga rastet ku paratë e shtetit janë dhënë me muahbet të drejtëpërdrejtë”, shkroi kreu i LDK-së, ndërsa shpërndau fjalimin e plotë.

Ndryshe, në mungesë të kuorumit të enjten dështoi të themelohet komisioni hetimor për kontratat njëburimore për shkak se deputetët e Lëvizjes Vetëvendose (LVV) nuk morën pjesë në votim. Gjatë debatit parlamentar që zgjati rreth tri orë, deputetët e opozitës e akuzuan pushtetin për numër të madh të kontratave njëburimore të nënshkruara për tre vjet qeverisje.

Abdixhiku gjatë seancës së Kuvendit të Kosovës të enjten deklaroi se pushteti aktual i ka dhënë 781 tenderë njëburimore për një periudhë të shkurtër kohore, derisa i ka bërë thirrje partisë në pushtet që të mos i mbrojë ata që sipas tij i kanë dhënë këto kontrata të dyshimta. Gjithashtu, ai kërkoi që prokuroria e shtetit të merret me hetimin e kontratave njëburimore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.