Abdixhiku: Letra e Scholzit, Macronit e Melonit ekspozoi populizmin e Kurtit – dështim spektakolar, dëm historik

Kryetari i Lidhjes Demokratike të Kosovës (LDK), Lumir Abdixhiku, deklaroi se letra e boshtit Gjermani-Francë-Itali të mërkurën, përveç se ekspozoi populizimin e kryeministrit kosovar, Albin Kurti, ekspozoi Kosovën si një shtet që nuk di të jetë serioz në arenën ndërkombëtare, duke shtuar se krerët institucionalë e konsideruan diplomacinë si “një kafe militantësh”.

Kancelari i Gjermanisë, Olaf Scholz, kryeministrja e Italisë, Giorgia Meloni, dhe presidenti i Francës, Emmanuel Macron, në një letër të përbashkët për kryeministrin, theksuan se ekziston rreziku që pa progres drejt Asociacionit të Komunave me Shumicë Serbe në bazë të draftstatutit të Bashkimit Evropian (BE), aplikimi i Kosovës s’do të marrë mbështetjen e nevojshme.

“Letra e tre aleatëve të pavarësisë dhe rrugëtimit tonë shtetar, nuk ekspozon thjesht një kryeministër populist që manipulon me ndjenjat nacionale në dëm të interesave shtetare. Ajo e ekspozon Kosovën si një shtet që nuk di të jetë serioz në arenën ndërkombëtare”, shkroi kreu i LDK-së në “Facebook” të enjten në mbrëmje pas zhvillimeve të reja rreth Këshillit të Evropës.

“Partnerët e Kosovës nuk janë militantë partiakë që kur Kryeministri i viziton u jep pasqyrën e shtetit të falimentuar si sukses qeveritar. Subjektiviteti ndërkombëtar i Kosovës nuk është platformë zgjedhore mbi të cilën merren votat”, theksoi Abdixhiku, duke e cilësuar gjithashtu “dështim spektakolar, turpërim ndërkombëtar e dëm historik” lëvizjen e fundit të autoriteteve.

“Shteti dhe qytetarët tanë nuk ua kanë borxh të ardhmen një njeriu që luan me detyrimet e shtetësisë e që rrënon reputacionin e shtetit të Kosovës kaq keq. Duke i trajtuar partnerët si militantë, diplomacinë si kafehane e Kosovën si fushë mbjellje e korrjeje të votave në dëm të prodhimeve të duhura ndërkombëtare, ne po shndërrohemi në një vend të zymtë”.

Ministrja e Punëve të Jashtme, Donika Gërvalla-Schwarz, në një letër drejtuar presidentit të Asamblesë Parlamentare të Këshillit të Evropës, Theodoros Rousopoulos, deklaroi se Qeveria e Kosovës është duke përgatitur një draftstatut për Asociacionin e Komunave me Shumicë Serbe të cilin është zotuar ta dërgojë në Gjykatën Kushtetuese deri në fund të majit.

E zotimi i ekzekutivit kosovar për hartimin dhe dërgimin e draftstatutit në kushtetuese vjen në prag të seasionit pranveror të Komitetit të Ministrave (16-17 maj), ku anëtarësimi i vendit të vogël ballkanik nuk është në rend dite për shkak se Qeveria e Kosovës hodhi poshtë kërkesën e Gjermanisë, Francës dhe Italisë që të bëjë hapa konkretë drejt ngritjes së mekanizmit.

Ekskluzive: Letra e Francës, Gjermanisë dhe Italisë për Kurtin: Hapat që ndërmore s’mjaftojnë, duhet dërgim në Kushtetuese i draftit të BE-së

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.