Kryetari i Lidhjes Demokratike të Kosovës (LDK), Lumir Abdixhiku, nëpërmjet një video-mesazhi të publikuar në llogarinë e tij në “Facebook”, ka reaguar pas përpjekjeve të deputetëve të Lëvizjes Vetëvendosje dhe kabinetit qeveritar për të arsyetuar aferat korruptive të njerëzve rreth pushtetit.
Abdixhiku ka përmendur aferën e fundit korruptive në Ministrinë e Industrisë, Ndërmarrësisë dhe Tregtisë (MINT), skandalin financiar të ambasadorit të Kosovës në Slloveni, Martin Berishaj dhe ish-kryeshefin e Korporatës Energjetike të Kosovës (KEK), Nagip Krasniqi, i cili dyshohet për korrupsion.
Kreu i LDK-së ka thënë se kryeministri i Kosovës, Albin Kurti, tash po mbron “kriminelët në pranga e krimin rreth tij” – ndryshe nga premtimet për luftën kundër korrupsionit – ndërsa ka shtuar se kjo gjendje është veçse “vazhdimësi e hajnisë”, që sipas tij, vendit nuk i është ndarë tash e shumë kohë.
Reagimi i kryetarit të LDK-së vjen pas përpjekjeve të pushtetit për të justifikuar arrestimin e tre personave – dy zyrtarë të MINT-it dhe biznesmenit të afërt me pushtetin, Ridvan Muharremi “Ridi” – nën dyshimet se kanë bërë keqpërdorime gjatë procedurave për blerjen e rezervave shtetërore.
“Mbrojtja për Ridin që i merr ‘vetëm’ 3 përqind; për Martinin që i tërheqë 1.4 milion kesh në Prishtinë, apo për Nagipin që jep tender 3.5 milionësh një biznesi pa qarkullim – është vazhdimësi e hajnisë që Kosovës nuk i është ndarë tash e shumë kohë”, ka thënë Abdixhiku.
Abidixhiku ka bërë thirrje për ndryshim derisa ka akuzuar ekzekutivin për praktika tashmë të njohura korruptive. Ai ka kërkuar mbështetje për inciativën “Rruga e Re”, nisur me idenë e një alternative ndaj “politikave të gabuara” të Qeverisë së Kosovës.
“A është ky ndryshimi i njëmendtë të cilin e kërkonim ndër vite? Të dëgjojmë krahasime se këta apo të tjerët para tyre janë hajna më të mëdhenj? Pas shumë përpjekjeve për evropianizim, a duhet të mjaftohemi me një qeveri e kryeministër që mbronë kriminelët në pranga e krimin rreth tij?”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
