Lajme

Abazoviç: E porosita Kurtin që mos të hyjë në konflikt me ndërkombëtarët


Albin Kurti dhe Dritan Abazoviç

Kryeministri me mandat teknik i Malit të Zi, Dritan Abazoviç, thotë se gjatë takimit që e kishte me kryeministrin e Kosovës, Albin Kurtin katër ditë më parë, e ka porositur “që mos të hyjë në konflikt me ndërkombëtarët”.

“Më tha se tashmë ka kontakte me Brukselin dhe se do të ketë bisedime. Përshtypja ime është se ka vullnet për t’i tejkaluar problemet”, tha Abazoviç në një intervistë për RTV 21 në gjuhën maqedonase.

Abazoviç theksoi se situata në Kosovë nuk do të përshkallëzohet, prandaj shtoi se “nuk është i qetë”.

“Por kur shohim se çfarë gjërash po ndodhin, nuk mund të jemi të qetë. Nuk është mirë t’i kthehemi politikës së viteve 90-ta. Kur sheh disa skena, ke ndjesinë se është një “deja vu” dhe unë mendoj se është keq”, shtoi ai.

Ai potencoi se Mali i Zi është i vetmi vend në rajon që nuk ka çështje të hapura me asnjë shtet në Rajon, derisa ka shtuar se qeveria e tij nuk ndërhyn në marrëdhëniet e askujt.

Abazoviç e ka ripërsëritur se vendi i tij është i gatshëm të jetë vendi i dytë në rajon i cili mirëpret një takimi të nivelit të lartë në kuadër të dialogut Kosovë-Serbi.

“Mund të ofrojmë mbështetje logjistike për një takim të përbashkët në vendin tonë. Jemi më se të gatshëm ta organizojmë, natyrisht në bashkëpunim me BE-në dhe SHBA-në”, shtoi ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore