AAK shkarkon nga partia kandidatin për kryetar të komunës së Dragashit

Aleanca për Ardhmërinë e Kosovës (AAK) ka shkarkuar ish-kandidatin e saj të për kryetar të Komunës së Dragashit, Agron Gashin, për shkak të lidhjes së koalicionit me partinë në pushtet lokal, Lidhjen Demokratike të Kosovës(LDK).

Ky subjekt politik këtë e ka bërë të ditur përmes një vendimi të marrë nga Kryesia e degës së AAK-së në Dragash.

Sipas vendimit, Gashi është shkarkua për shkak se i njëjti në kundërshtim me statusin e AAK-së dhe pa konsultim me kryesinë e degës, ka lidhur koalicion me partinë në pushtet, LDK-në.

AAK ka kërkuar nga kryetari i AAK-së në Dragash, Behxhet Xheladini të mos emërojë në asnjë detyrë dhe funksion asnjë anëtar të AAK-së pa konsultim paraprak.

Kandidati i AAK-së, në zgjedhjet lokale të 17 tetorit të vitit të kaluar kishte arritur të marr gjithsej 281 vota ose 2.05% të votave, duke u radhitur si kandidati i pestë nga gjashtë sa ishin gjithsejtë.

Sipas rezultateve përfundimtare të Komisionit Qendror të Zgjedhjeve (KQZ), kandidati i LDK-së, Bexhet Xheladini me 6 mijë e 192 vota ose 51.16 % ka fituar kundrejt kandidatit të Partisë Demokratike të Kosovës (PDK), Shaban Shabani i cili arriti të marrë 5 mijë e 912 vota, ose 48.84%, pra 280 vota më pak se fituesi.

Ndryshe, më 25 nëntor, Gjykata Supreme pati vendosur për rivotim të diasporës nga Dragashi.

“Urdhërohet Komisioni Qendror i Zgjedhjeve që brenda Kornizës Ligjore në fuqi të organizojë përsëritjen e Procesit të Votimit nga jashtë, për raundin e dytë të zgjedhjeve lokale për kryetar të komunës së Dragashit”, thuhej në aktgjykim.

PZAP kishte aprovuar ankesën e kandidatit të Partisë Demokratike të Kosovës (PDK), për kryetar të Dragashit, Shaban Shabani.

Pas vendimit të Gjykatës Supreme që votat e ardhura me postë nga jashtë për Komunën e Dragashit të mos njihen, Partia Demokratike e Kosovës (PDK) deklaroi se ka mirëpritur këtë vendim.

Sipas PDK-së, votat që kanë ardhur me postë kanë qenë të manipuluara.

“Votat që kishin ardhur me postë për Komunën e Dragashit ishin të manipuluara me qëllim të deformimit të rezultatit zgjedhor dhe cenimin e vullnetit të mijëra qytetarëve të Dragashit të cilët më 14 nëntor përmes një procesi fer e demokratik rizgjodhën Shaban Shabanin kryetar për mandatin e ri katërvjeçar”, thuhej në njoftimin e PDK-së.

Në Dragash ishte përmbysur rezultati pas numërimit të votave të ardhura nga diaspora, duke nxjerr fitues kandidatin e Lidhjes Demokratike të Kosovë (LDK), Bexhet Xheladini, i cili kishte marr gjithsej 244 vota, ndërsa kandidati i cili me votat e 14 nëntorit doli fitues, Shaban Shabani nga Partia Demokratike e Kosovës (PDK), nga diaspora kishte arritur të marr vetëm 54 vota.

Kjo ishte bërë e ditur pas përfundimit të numërimit të votave me postë në Qendrën e Numërimit dhe Rezultateve (QNR) për raundin e dytë të zgjedhjeve lokale të cilat u mbajtën me 14 nëntor.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.