AAK-ja paralajmëron “ballafaqim të vërtetë” me Qeverinë – “Kurti do të jetë lakuriq në projektet e tij”

Shefi i grupit të Aleancës për Ardhmërinë e Kosovës, Besnik Tahiri, teksa ka paralajmëruar ballafaqim të vërtetë me Qeverinë të premten, ka thënë se zgjidhja e vetëm për ta përmirësuar Kosovën është shkarkimi i kryeministrit Albin Kurti, e jo shpërbërja e Kuvendit.

“Të premten, do të jetë ballafaqimi i vërtetë mes Qeverisë së Kosovës dhe Aleancës për Ardhmërinë e Kosovës. Ka një kohë të gjatë që kryeministri i Kosovës, Albin Kurti, s’ka dhënë llogari për punën që po bëhet në shtetndërtim”, ka deklaruar ai pas mbledhjes së kryesisë.

Tahiri, konsideron se nëse Kurti i shkon mandatit deri në fund, puna e tij në këtë qeverisje do të shpaloset e tëra.

“S’kemi të bëjmë me problemin e numrave për shpërbërjen e Kuvendit, kemi të bëjmë me konceptin e shkuarjes në zgjedhje”.

“Kurti dëshiron të ikë nga përgjegjësia e një mandati të plotë. Çka mund të tregojë ky kryeministër, ky kabinet për katër vjet? Nëse shkon deri në fund, nëse nuk dorëhiqet ky do të jetë lakuriq në projektet e tij”.

Nga këndvështrimi i tij, Kuvendi s’duhet të marrë përgjegjësinë për dështimet e kreut të ekzekutivit.

“Shpërbërja e Kuvendit, në këtë fazë nënkupton një dalje për Qeverinë Kurti, njëfarë forme marrjen e fajit nga Kuvendi për dështimet e Qeverisë”, tha Tahiri para gazetarëve.

Ndër të tjera, Tahiri parashtroi një pyetje drejtuar qytetarëve dhe kryeministrit.

“Kosova është në zgjedhje, pyetja që dua të ua bëj kryeministrit dhe qytetarëve është si si u bë ky kaq i mirë me opozitën që të ja votojmë mocionin, a është më të vërtetë që opozita dëshiron të fitojë diçka. Zotëri Kurti, e di që ka dështuar dhe dështimin e tij dëshiron të ia faturoj Kuvendit të Kosovës”.

Ndërsa, shefja e Grupit Parlamentar të Lëvizjes Vetëvendosje, Mimoza Kusari-Lila, pas mbledhjes së kryesisë ka deklaruar se akoma s’ka kërkesë zyrtare për shpërndarja të Kuvendit.

Aleanca për Ardhmërinë e Kosovës (AAK) dhe Lidhja Demokratike e Kosovës (LDK), javën e kaluar kishin refuzuar ftesën e Kurtit për t’u takuar të hënën, i vetmi që ka pranuar ftesën e Kurtit ka qenë kryetari i PDK-së, Memli Krasniqi.

Nga këto dy parti është thënë se refuzimi është bërë për shkak se e kanë konsideruar “shumë të vonuar” ftesën e kryeministrit nën argumentin se pushteti e ka shuar frymën e bashkëpunimit.

Partitë politike veçse kanë nisur të mobilizohen për shkak të mundësisë së zgjedhjeve të reja pak para përfundimit të mandatit të qeverisë së drejtuar nga Lëvizja Vetëvendosje (LVV).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.