A ndikojnë mollët në nivelin e sheqerit në gjak?

Mollët janë të shijshme, ushqyese dhe të përshtatshme për t’u ngrënë. Megjithëse dihet që mollët kanë shumë përfitime shëndetësore, ato gjithashtu përmbajnë karbohidrate, të cilat mund të ndikojnë në nivelin e sheqerit në gjak.

Mirëpo, karbohidratet që gjenden në mollë ndikojnë në trupin tuaj ndryshe nga sheqernat që gjenden në ushqimet që përmbajnë sheqerna të rafinuar dhe të përpunuar.

Mollët janë ushqyese dhe mbushëse

Mollët janë një nga frutat më të njohura në botë. Ato janë gjithashtu shumë ushqyese. Në fakt, mollët janë të pasura me: vitaminë C, fibra dhe disa antioksidantë.

Një mollë mesatare përmban 104 kalori, 27 gram karbohidrate dhe 9 miligramë vitaminë C.

Një pjesë e madhe e vlerës ushqyese të mollës gjendet në lëkurën e saj shumëngjyrëshe. Pra, larja dhe mbajtja e lëkurës gjatë ngrënies ose gatimit është mënyra më e mirë për të optimizuar ushqimin që po merrni.

Mollët ndikojnë vetëm mesatarisht në nivelin e sheqerit në gjak

Mollët përmbajnë sheqer, por pjesa më e madhe e sheqerit që gjendet në mollë është fruktoza.

Kur fruktoza konsumohet në një frut të plotë, ajo ka shumë pak efekt në nivelet e sheqerit në gjak.

Gjithashtu, fibra në mollë ngadalëson tretjen dhe thithjen e sheqerit. Kjo do të thotë se sheqeri hyn ngadalë në qarkullimin e gjakut dhe nuk rrit me shpejtësi nivelet e sheqerit në gjak.

Për më tepër, polifenolet, të cilat janë përbërës bimorë që gjenden në mollë, gjithashtu mund të ngadalësojnë tretjen e karbohidrateve dhe të ulin nivelet e sheqerit në gjak.

Mollët kanë rezultate relativisht të ulëta si në shkallën e indeksit glicemik (GI) ashtu edhe në shkallën e ngarkesës glicemike (GL), që do të thotë se ato duhet të shkaktojnë një rritje minimale të niveleve të sheqerit në gjak.

Mollët mund të ulin rezistencën ndaj insulinës

Ekzistojnë tre lloje të diabetit – tipi 1, jo i varur nga insulina (tipi 2) dhe diabeti gestacional.

Diabeti i tipit 1 është një çrregullim autoimun në të cilin pankreasi juaj nuk prodhon mjaftueshëm insulinë, hormoni që transporton sheqerin nga gjaku juaj në qelizat tuaja. Insulina duhet të merret çdo ditë.

Nëse keni diabet të tipit 2, trupi juaj zakonisht nuk prodhon insulinë të mjaftueshme për të përmbushur nevojat tuaja ditore, përveç rezistencës qelizore ndaj insulinës që prodhohet.

Ngrënia e rregullt e mollëve ka potencialin të reduktojë rezistencën ndaj insulinës, e cila duhet të çojë në uljen e niveleve të sheqerit në gjak.

Kjo është për shkak se polifenolet në mollë, të cilat gjenden kryesisht në lëkurën e mollës, stimulojnë pankreasin tuaj të lëshojë insulinë dhe ndihmojnë qelizat tuaja të marrin sheqer.

Antioksidantët që gjenden në mollë mund të ulin rrezikun e diabetit

Disa studime kanë zbuluar se ngrënia e mollëve lidhet me një rrezik më të ulët të diabetit.

Një përmbledhje e studimeve të vitit 2019 tregoi se ngrënia e mollëve dhe dardhave ishte e lidhur me një rrezik të zvogëluar të problemeve kardiovaskulare dhe diabetit të tipit 2.

Tre studime grupore nga viti 2013 zbuluan se konsumi më i madh i frutave të plota, veçanërisht i boronicës, rrushit dhe mollëve, lidhej me një rrezik më të ulët të diabetit të tipit 2. E njëjta gjë nuk u gjet për lëngjet e frutave.

Ka shumë arsye që mollët mund të ndihmojnë në parandalimin e diabetit, por antioksidantët që gjenden te mollët kanë gjasa të luajnë një rol të rëndësishëm.

Antioksidantët janë substanca që parandalojnë disa reaksione kimike të dëmshme në trupin tuaj. Ato kanë përfitime të shumta shëndetësore, duke përfshirë mbrojtjen e trupit tuaj nga sëmundjet kronike.

A duhet të hanë mollë njerëzit me diabet?

Mollët janë një frut i shkëlqyer për t’u përfshirë në dietën tuaj nëse keni diabet.

Shumica e udhëzimeve dietike për njerëzit që jetojnë me diabet rekomandojnë një dietë që përfshin fruta dhe perime.

Frutat dhe perimet janë plot me lëndë ushqyese si vitamina, minerale, fibra dhe antioksidantë.

Përveç kësaj, dietat e pasura me fruta dhe perime janë lidhur vazhdimisht me rrezik më të ulët të sëmundjeve kronike, të tilla si sëmundjet e zemrës dhe kanceri.

Ndërsa mollët nuk kanë gjasa të shkaktojnë rritje të niveleve të sheqerit në gjak, ato përmbajnë karbohidrate. Nëse po numëroni karbohidratet, sigurohuni që të merrni parasysh 27 gram karbohidrate që përmban një mollë.

Gjithashtu, sigurohuni që të monitoroni sheqerin në gjak pasi të keni ngrënë mollë dhe të shihni se si ato ndikojnë tek ju personalisht.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.