Në Itali, që nga viti 2006, mjekët kanë qenë në gjendje të shkruajnë preparate master që përmbajnë substanca aktive të bazuara në kanabis për përdorim mjekësor.

Kështu ka thënë për të përditshmen italiane Corriere della Sera Arrigo Schieppati, nga Qendra Kërkimore Klinike për Sëmundjet e Rralla, Instituti Mario Negri, Bergamo.

Përshkrimi i kanabisit (sipas dekretit ministror 9/11/2015) kufizohet në trajtimin e dhimbjeve kronike dhe të atyre që lidhen me sklerozën e shumëfishtë, si dhe dëmtimet e shtyllës kurrizore; të përziera dhe të vjella të shkaktuara nga kimioterapia, radioterapia, terapitë e HIV-it; si stimulues i oreksit në anoreksi, humbje të oreksit në pacientët me kancer ose ata që vuajnë nga SIDA dhe anoreksia nervore; si dhe për efektin hipotensiv në glaukoma.

Sipas mjekut, trajtimi mund të bëhet nga goja, në trajtë vaji, ose duke përdorur avullues të veçantë.

Por, kultivimi i bimëve të kanabisit është një krim, ashtu si tregtimi i kanabisit që nuk prodhohet nga kompani të autorizuara, edhe nëse ka një kërkesë mjekësore.

“Specialistët që mund të përshkruajnë kanabis për përdorim terapeutik janë mjekët e spitaleve në departamentet e anestezisë, menaxhimit të dhimbjeve, neurologjisë, sëmundjeve infektive, onkologjisë, oftalmologjisë, reumatologjisë, radioterapisë, psikiatrisë dhe kujdesit paliativ”, ka treguar Schieppati.

Sipas tij, dikush mund të mendojë se, përtej sëmundjes themelore, receta nga specialistë të autorizuar mund të marrë parasysh efektet negative që lidhen me sëmundjen dhe terapinë, si dhimbje kronike, të përziera, ankth. Megjithatë, ajo që duhet vlerësuar gjithashtu është efekti i kanabisit në sëmundjet e veshkave, i cili ende nuk dihet.

Referuar mjekut, tema e marrëdhënies midis konsumit të kanabisit dhe sëmundjeve të veshkave është në fakt objekt i interesit nga studiuesit dhe klinicistët.

“Duke pasur parasysh rëndësinë në rritje të shëndetit publik të ekspozimit ndaj kanabisit, është e qartë se nevojiten shumë më tepër kërkime për të sqaruar efektet e ndryshme fiziologjike dhe patologjike të kanabisit në funksionin e veshkave dhe sëmundjet që prekin veshkat”.