Koordinatori i Departamentit për Drejtësi në Kabinetin për Qeverisje të Mirë të Partisë Demokratike të Kosovës, Përparim Gruda, ka refuzuar të jap një qëndrim në emër të partisë, për takimin që deputeti i PDK-së, Hisen Berisha, e ka pasur me ambasadorin e Kosovës në Kroaci, Martin Berishajn.

Berishaj është nën hetime nga organet e rendit në Kosovë për disa vepra, siç është mos-deklarim i pasurisë, evazion fiskal dhe të tjera, derisa rasti i tij ka qenë një nga kauzat e PDK-së në opozitë, por për befasinë e shumë kujt, deputeti Hisen Berisha u takua me të dhe i thuri lavde të shumta në një status në Facebook.

Per Berishajn, deputeti opozitar tha se ka “autoritetin dhe nderin më të lartë”.

I pyetur për këtë takim dhe këto qëndrime, Gruda tha se s’mund të flas në emër të partisë, paçka se ai personalisht mendon se ishte takim i gabuar.

“Pyetja duhet t’i drejtohet kryetarit të partisë, s’mund të flas në emër të PDK-së, por mund të jap qëndrimin personal dhe personalisht mendoj që është një gjë e gabuar që e ka bërë deputeti i PDK-së”, tha Gruda shkurt, për të kaluar në çështje të tjera.

Fillimisht u raportua, e më pas Martin Berishaj, para komisionit parlamentar, e pati konfirmuar vetë, se ai edhe derisa ishte ambasador i Kosovës ishte paguar nga kompania që merret me energji elektrike GEN-I, dega në Beograd me shuma të majme parash për t’iu dhënë “këshilla” sa u përket tregjeve të energjisë në Ballkan.

Berishaj, përkundër se me profesion profesor i shkencave politike, kishte thënë se paguhej nga një kompani që merret me energjinë, sepse informacioni që ky e posedonte ishte i vlefshëm për ta.

Berishaj kishte themeluar edhe një kompani në Mal të Zi për këtë punë “MB Consulting”, e cila nuk kishte asnjë punëtor, pos atë vetë dhe të cilën Berishaj nuk e kishte deklaruar fare në deklarimin e tij të pasurisë.

Ai kishte edhe dy kompani të tjera në Kosovë, që po ashtu nuk i kishte deklaruar.

Përtej kësaj, Berishaj kishte tërhequr shuma që kapin shifrat e milionave nga bankat në Kosovë dhe në Mali të Zi dhe asnjëherë nuk është sqaruar se çfarë ndodhi me paratë kesh që i ka tërhequr.

Ai tashmë është intervistuar nga prokuroria e Kosovës dhe po vazhdon të hetohet.

El Profesor Martin Berishaj – erdhi, konfirmoi pothuajse gjithçka, shkoi