A është “shumë” kërkesa e SPAK për Berishën?

Sali Berisha do të ruhet me policë te dera në momentin që do të jetë në arrest shtëpie.

Kjo është masa e komunikuar nga Prokuroria e Posaçme SPAK të martën e 26 dhjetorit. Arsyeja: për të parandaluar mundësinë që të largohet nga shtëpia.

Ky vendim ka krijuar polemika nga politikanë dhe jo vetëm. Për pikëpyetjet e ngritura, Albanian Post ka komunikuar me njohës të ligjeve dhe politikës.

Situata, thekson juristi Kreshnik Spahiu ka ardhur si rrjedhojë e shkeljeve procedurale të ish-kryeministrit.

“Çdo shtetas i Republikës së Shqipërisë nëse do refuzonte të ekzekutonte vendimin e gjykatës për masën e sigurisë ‘detyrim për paraqitje’ do përfundonte në burg me një masë më të ashpër sigurimi personal. Qëkur është hartuar Kodi Procedurës Penale ky është rregulli posaçëm. Prokuroria kur konstaton që i pandehuri refuzon masat e sigurisë kërkon ashpërsimin”, thotë Spahiu për AP në pikënisje të komentit të tij.

Kështu sipas analistit, në rastin e Berishës, SPAK ka bërë thjesht detyrën.

“Ishte e paprecedent që një i pandehur për korrupsion të hetohej i lirë. 100% e praktikave penale nuk e kanë njohur një rast ku i akuzuar për korrupsion të hetohet i lirë. Berisha u privilegjua nga SPAK dhe u trajtua i pabarabartë duke e favorizuar me ‘detyrim paraqitje’”.

Ndërsa, politologu Shpendi Gashi ngre një pyetje për “dyshimet që ngjall masa e kërkuar”.

“Në thelb është zbatimi i një procedure të thjeshtë ligjore, apo bllokim i kryetarit të opozitës? Ky veprim bllokon në masivizimin e trupave opozitarë dhe e lë pa kokë opozitën në zgjedhjet e ardhshme. Pra, i bie morali”, ravijëzon Gashi për AP.

Spahiu e lexon ndryshe. Sipas tij, “truket” e Berishës për t’ju shmangur detyrimit për paraqitje detyruan Prokurorinë speciale të ndryshoj qëndrim juridik.

“Nëse shtetasi Berisha do paraqitej pranë policisë gjyqësore në ditët që përcaktoi gjykata nuk do kërkohej arresti tij”, ravijëzon Spahiu.

Nga ana tjetër, për Gashin Berisha po luan lojën e SPAK-ut.

“Ata po duan të trajtojnë një çështje politike në kuadrin juridik dhe Berisha po kthehet në të njëjtën monedhë kështu që nuk shikoj ndonjë pamoralshmëri nga ana e ti pasi është e drejtë të mbrojë veten e vetë. Në qoftë se ju mbijeton gjyqeve pa u rrëzuar politikisht mund të jetë mënyra më e mirë e mundshme për të pastruar llumin që është hedhur gjatë 33 vjetëve në politikë”.

Në lidhje me vijimësinë e qëndrimit të Berishës kundrejt drejtësisë, për juristin s’ka alternativë në rast se arrestohet në shtëpi.

“Ai do jetë i detyruar ta respektoj izolimin sepse do jetë i rrethuar dhe izoluar me policë në dyert e banesës së tij”.

Spahiu nuk mendon se ish-kryeministri do tentojë ta thyej vendimin e gjykatës për dy arsye.

“E para nuk do mundte ta thyente arrestin fizikisht sepse është e pamundur. Dhe, e dyta, çdo përpjekje për te mos respektuar ‘arrestin në shtëpi’ do e dërgonte automatikisht ne ‘arrest me burg’. Berisha nuk do luajë me ‘zjarrin’. Nesër merr fund karriera e tij politike”.

Ndërsa për politologun Gashi, një gjë është e sigurtë: “Organizimi opozitar shkon drejt mosbindjes civile”.

“Kështu që besoj se Berisha do jetë brenda kuadrit ligjor, për të mos e shkelur atë lloj mase. Ai do bëjë të pamundurën ta diskreditojë strukturës së SPAK-ut”.

E mërkura është ditë e gjatë dhe e ngjeshur në dyert e Gjykatave. Një sërë çështjesh të nxehta presin vendime.

Në orën 09:00 në gjykatën e Lartë do të jetë vendimi për vulën. Vetë rithemelimi ka njoftuar protestë.

Dhe, vetëm dy orë pas saj do të jetë seanca ku gjyqtarja Irena Gjoka do të vendosë për kërkesën e SPAK për “fatin” e vetë Berishës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.