Chelsea i ka vënë sytë te Jules Kounde si objektivin kryesor për tregun e transferimeve të dimrit, sipas gazetës katalanase “Sport”.
E gatshme për të investuar sërish në treg, skuadra londineze po përgatit një ofertë prej 60 milionë eurosh për mbrojtësin francez, i cili është vendosur si titullari i padiskutueshëm në skemën e Hansi Flick te Barcelona.
Nevoja për të përforcuar krahun e djathtë të mbrojtjes e ka shtyrë skuadrën e drejtuar nga Enzo Maresca të kërkojë alternativa pas dëmtimeve të përsëritura të Reece James, kapitenit të tyre që është në vështrimin e Real Madrid-it për merkaton e verës.
Kounde, i cili ishte tashmë në orbitën e Chelsea-t në vitin 2022 përpara se të zgjidhte të bashkohej me Barcelona-n, shihet si zgjidhja ideale për problemet e mbrojtjes së klubit anglez.
Performanca e tij ka qenë kyçe për Barçën dhe megjithëse kontrata e tij me ekipin katalanas zgjatet deri në vitin 2027, një ofertë e konsiderueshme mund të hapë derën e largimit të tij.
Te Barcelona, mundësia e një shitjeje nuk është përjashtuar, duke pasur parasysh se Kounde ka një vlerë të lartë në treg që mund të nënkuptojë një injeksion të konsiderueshëm financiar për klubin.
Në rast se nënshkrimi i Kounde nuk realizohet, Chelsea po shikon Jeremie Frimpong, mbrojtësin e djathtë të Bayer Leverkusen, si një opsion të dytë.
Megjithëse holandezi ka qenë në radarin e klubeve të tjera të mëdha, përfshirë Barçën, nënshkrimi i tij mund të jetë një alternativë e mundshme nëse negociatat për Kounde bëhen të ndërlikuara.
Vendimi përfundimtar i Chelsea-t do të varet nga mënyra se si do të përparojnë negociatat në muajt e ardhshëm, por është e qartë se klubi mbetet i gatshëm të investojë shumë për të siguruar konkurrencën e tij për pjesën tjetër të sezonit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
