Selimi vlerëson se pas dështimit në Këshill të Evropës, sanksionet ndaj Kosovës mund të pezullohen
![](https://albanianpost.com/wp-content/uploads/2024/05/selimi1-1.png)
Ish-ministri i Punëve të Jashtme të Kosovës, Petrit Selimi, nëpërmjet një postimi në platformën “X” të hënën, vlerësoi se pas dështimit të vendit për t’u anëtarësuar në Këshill të Evropës këtë muaj, sanksionet e Bashkimit Evropian (BE) kundër Kosovës mund të pezullohen, duke marrë parasysh edhe faktin se mini-referendumi në veri dështoi për shkak të bojkotit serb.
“Një lëvizje e parashikueshme tani nga BE-ja ndoshta do të jetë pezullimi i sanksioneve kundër Kosovës. Pas dështimit të Kosovës për t’iu bashkuar Këshillit të Evropës, tani lavjerrësi duhet të lëvizë pak prapa, veçanërisht ngase zgjedhjet në veri dështuan për shkak të bojkotit serb. Rutinë e policit të mirë / policit të keq”, shkroi të hënën ish-kryediplomati kosovar.
Kërkesa e Kosovës për t’iu bashkuar Këshillit të Evropës nuk u mor parasysh nga organi vendimmarrës i organizatës, pavarësisht letërzotimit të autoriteteve kosovare para takimit të kryediplomatëve, kryesisht për shkak se Gjermania, Franca dhe Italia, vendosën kusht që Kosova të bëjë hapa konkretë drejt themelimit të Asociacionit të Komunave me Shumicë Serbe.
E sanksionet e vendosura nga BE-ja kundër Kosovës vitin e kaluar, për të parën herë qysh nga shpallja e pavarësisë, zor se mund të injorohen. Në mesin e shteteve anëtare megjithatë ekziston një dilemë: ndonëse pajtohen për largimin e sanksioneve ndaj Kosovës, disa duan “heqje graduale” të masave, kurse tjera duan që sanksionet të hiqen në mënyrë të menjëhershme.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com