![](https://albanianpost.com/wp-content/uploads/2024/04/okb1.jpeg)
Në Nju Jork të Shteteve të Bashkuara të Amerikës (SHBA), këtë të hënë (sot, 22 prill), pritet të mbahet seanca e radhës e Këshillit të Sigurimit të Organizatës së Kombeve të Bashkuara (OKB), ku do të shqyrtohet raporti i ri gjashtëmujor i Sekretarit të Përgjithshëm të OKB-së, Antonio Guterres, për punën e misionit mbështetës të OKB-së në Kosovë (UNMIK).
Presidentja e Kosovës, Vjosa Osmani, më 18 prill, udhëtoi drejt selisë së OKB-së në Nju Jork, ku do të përfaqësojë Kosovën, ndërsa përballë do ta ketë presidentin serb, Aleksandër Vuçiç, i cili do të përfaqësojë Serbinë. Seanca e Këshillit të Sigurimit mbi raportin e UNMIK-ut pritet të fillojë në orën 16:00 në bazë të kohës lokale në Prishtinë, respektivisht në ora 10:00.
Në raportin që i referohet periudhës nga 19 shtatori 2023 deri më 15 mars 2024 që do ta prezantojë shefja e UNMIK-ut, Caroline Ziadeh, një pjesë e madhe i kushtohet ngjarjeve të 24 shtatorit në fshatin Banjë të Zveçanit – komunë e banuar me shumicë serbe – në pjesën veriore të Kosovës. Guterres e cilësoi “incident të rëndë të sigurisë” sulmin e armatosur.
Guterres, në raportin gjashtëmujor mbi punën e misionit të OKB-së në Kosovë, bëri thirrje që përgjegjësit për sulmin terrorist në pjesën veriore të Kosovës të vihet para organeve të drejtësisë pa vonesa të mëtejshme.
“Dënoj fuqishëm incidentin e rëndë të sigurisë që ndodhi më 24 shtator 2023 në Banjska që çoi në humbjen tragjike të jetëve dhe bëj thirrje që hetimi të përfundojë e organizatorët të dalin para drejtësisë pa vonesë”, deklaroi Guterres në raportin i cili u publikua në faqen e internetit të OKB-së.
Guterres përshëndeti progresin e arritur në fund të vitit 2023 në zbatimin e marrëveshjeve të arritura në kuadër të dialogut për normalizimin e marrëdhënieve nën patronazhin e Bashkimit Evropian (BE), duke përfshirë zbatimin e udhërrëfyesit për energjinë dhe njohjen reciproke të targave të automjetëve që mundësuan lirinë e lëvizjes ndërmjet Kosovës dhe Serbisë.
Ai adresoi edhe çështjen e Asociacionit të Komunave me Shumicë Serbe, rregulloren e re të Bankës Qendrore të Kosovës (BQK), i cili ndaloi përdorimin e dinarit serb, dhe zgjedhjet e jashtëzakonshme në katër komunat veriore të banuara kryesisht me serbë etnikë, duke i bërë thirrje Kosovës dhe Serbisë të tregohen palë konstruktive në procesin e dialogut.
Në tetor të vitit të kaluar u mbajt seanca e fundit e Këshillit të Sigurimit të OKB-së mbi punën e UNMIK-ut. Këshilli i Sigurimit i OKB-së gjithashtu mbajti në shkurt të këtij viti një seancë të jashtëzakonshme pas kërkesës së Serbisë, veçanërisht pas vendimit të Bankës Qendrore të Kosovës (BQK) për të ndaluar përdorimin e dinarit serb brenda territorit kosovar.
Megjithëse anëtarët e Këshillit të Sigurimit janë të bashkuar në mbështetjen e dialogut të lehtësuar nga Bashkimi Evropian (BE) për për normalizimin e marrëdhënieve Prishtinë-Beograd, ndarjet e thella midis anëtarëve të përhershëm – SHBA, Rusia, Kina, Franca dhe Britania e Madhe – vazhdojnë ta karakterizojnë qasjen e këshillit ndaj zhvillimeve në këtë proces.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com