Ministri i Mbrojtjes i Italisë takon Maqedoncin: Prania jonë në KFOR, vendimtare për të shmangur tensionet
![](https://albanianpost.com/wp-content/uploads/2024/03/italia.jpeg)
Guido Crosetto, Ministër i Mbrojtjes së Italisë, gjatë qëndrimit të tij në Kosovë, është takuar me homologun e tij kosovar, Ejup Maqedonci, ku ka thënë se prania e trupave italianë në Kosovë në kuadër të misionit të NATO-s (KFOR), është vendimtare për të shmangur çfarëdo tensioni të mundshëm.
Lajmi u bë i ditur nga Ministria e Mbrojtjes së Italisë, përmes një postimi në platformën X.
“Mbi 20 vjet angazhim italian ndaj misionit të KFOR-it për të promovuar paqen dhe stabilitetin konfirmojnë lidhjen e fortë të miqësisë midis Italisë dhe Kosovës. Prania jonë vendimtare për të zbutur tensionet dhe për të shmangur përshkallëzimin midis palëve”, ka thënë Crosetto.
#Pristina
"Oltre 20 anni di impegno italiano nella missione @NATO_KFOR per promuovere pace e stabilità confermano forte legame di amicizia tra Italia e Kosovo. Nostra presenza determinante per mitigare tensioni e scongiurare escalation tra le parti." Così Min @GuidoCrosetto con… pic.twitter.com/AHh0KwAmdN— Ministero Difesa (@MinisteroDifesa) March 29, 2024
Ndryshe, Ministri i Mbrojtjes i Italisë, Guido Crosetto, të premten është duke qëndruar për vizitë zyrtare në Kosovë.
Crosetto, gjatë qëndrimit në Kosovë do të vizitojë ushtarët italianë të cilët po shërbejnë në vend në kuadër të misionit të NATO-s në Kosovë, KFOR-it.
Në njoftimin e publikuar nga Ministria e Mbrojtjes së Italisë bëhet e ditur se Crosetto do të festojë me ushtarakët italianë festën e Premtes së Madhe.
“Po nisem për Kosovë për të kaluar të Premten e Madhe me ushtrinë tonë. Atyre do t’i sjell përshëndetjet dhe mirënjohjet e shtetit dhe italianëve”.
Në njoftim bëhet e ditur se Crosseto do të zhvillojë edhe “takime të rëndësishme institucionale”, por pa dhënë detaje shtesë se me kë saktësisht do të takohet ministri italian.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com