![](https://albanianpost.com/wp-content/uploads/2024/03/varhelyi.jpg)
Komisioneri i Bashkimit Evropian (BE) për Fqinjësinë dhe Zgjerimin, Oliver Varhelyi, tha të martën se aplikimi i Kosovës për anëtarësim në BE nuk është shqyrtuar ende për shkak të ngritjes së tensioneve midis Kosovës dhe Serbisë, derisa përmendi vendimin e fundit të Bankës Qendrore të Kosovës (BQK) që ndalon përdorimin e dinarin serb në territorin kosovar.
Kosova dorëzoi dokumentacionin për anëtarësim në BE në dhjetor të vitit 2022, por BE-ja ende s’ka marrë ndonjë vendim se si do të procedohet tutje. Dhe arsye për këtë janë tensionet e vazhdueshme midis Prishtinës dhe Beogradit, konsideroi komisioneri hungarez. Ai theksoi se në vend të de-eskalimit të situatës, ngarjet e fundit dëshmuan të kundërtën.
Kështu deklaroi Varhelyi në një debat të përbashkët në Komisionin për Politikë të Jashtme të Parlamentit Evropian (PE), ku morën pjesë edhe disa ministra të Jashtëm të vendeve anëtare të bllokut, që u zhvillua të martën në Bruksel të Belgjikës. Nëtë debat, disa ministra kritikuan BE-në për ngadalësimin e procesit të zgjerimit dhe për lëvizje të afateve kohore.
Ministrja e Jashtme e Sllovenisë, Tanja Fajon, theksoi se ka pasur shumë vonesa në procesin e afrimit të vendeve të Ballkanit Perëndimor, duke përmendur sikurse pritjet e gjata për nisjen e negociatave të anëtarësimit me Shqipërinë dhe Maqedoninë e Veriut, ashtu edhe procesin e stërgjatur të heqjes së vizave për qytetarët e Kosovës (1 janar 2024).
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com