“Municion, bomba tymosëse, uniformë”: Policia e Kosovës sekuestron “pajisje të rrezikshme” në Mitrovicën e Veriut
![](https://albanianpost.com/wp-content/uploads/2023/12/policia-2.jpg)
Policia e Kosovës, gjatë realizimit të detyrave në funksion të ruajtjes së rendit dhe parandalimit të veprave penale në Mitrovicën e Veriut – komunë e banuar me shumicë serbe – njoftoi të hënën se pas informacioneve për fshehjen e “pajisjeve të rrezikshme” që mund të rrezikojnë jetët e qytetarëve, sekuestroi municion, bomba tymosëse, tela gjëmborë dhe një uniformë.
“Sot në orët e hershme kemi pranuar informacione të rëndësishme nga qytetarët lidhur me fshehjen e disa gjërave (pajisjeve të rrezikshme) të dyshuara që mund të rrezikojnë jetën e qytetarëve apo paraqesin rrezik potencial për përdorimin e tyre edhe ndaj personalit policor, por edhe pengimin në realizimin e detyrave ligjore”, thuhet në njoftim.
Në njoftim tërheqet vërejtja se uniforma e sekuestruar të hënën është identike me uniformat e përdorura nga grupi terrorist për sulmin e armatosur në fshatin Banjë të Zveçanit në pjesën veriore të vendit, ndërsa bëhet e ditur se operacionet e Policisë së Kosovës janë duke vazhduar me qëllim të parandalimit të ndonjë sulmi tjetër mbi organet e rendit.
Policia e Kosovës njoftoi se edhe të dielën, në pikë-kalimin kufitar Kosovë-Serbi në Merdarë është ndaluar një autobus me targa të huaja, kurse në një valixhe janë hasur disa pajisje të dyshuara ushtarake: tri thika luftarake, dy radiolidhje, një çantë ushtarake, një jelek taktik, një palë doreza, një helmetë taktike, tri bateria, dy këllëf për revole dhe një imitim i predhës.
Aksionet e Policisë së Kosovës vijnë vetëm një ditë pas alarmit të kryeministrit kosovar, Albin Kurti, i cili, gjatë një konference për media të shtunën, ka thënë se organizatori i sulmit terrorist në Banjë të Zveçanit – komunë e banuar me shumicë serbe – në veri të Kosovës, Millan Radoiçiç, aktualisht është duke planifikuar sulme të reja terroriste në Kosovë.
Prej sulmit terrorist në Banjë, para tre muajsh, edhe aktivitetet e Policisë së Kosovës janë shtuar. Policia e Kosovës javët e fundit ka ndërprerë rrjetet e kontrabandës, duke shkatërruar laboratorët e drogës dhe ndaljen e ‘minerave’ ilegale të prodhimit të kriptovalutave dhe konfiskimin e pronave nën menaxhimin e Agjencisë Kosovare të Privatizimit (AKP).
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com