![](https://albanianpost.com/wp-content/uploads/2023/11/albin-kurti-2.jpg)
Fytyrë varur e zë ngjizur, Albin Kurti, doli në konferencë për media me 24 shtator dhe tha se “sot është një ditë e rëndë për vendin tonë” jo vetëm për shkak të sulmuesve terroristë që mësynë Kosovën, por edhe për faktin se gjatë përballjes me ta kishte mbetur i vdekur një polic, Afrim Bunjaku.
“Vrasja e tij duhet të kthehet në angazhim të shtuar për të luftuar bandat që cenojnë rendin kushtetues të Kosovës”, deklaroi Kurti duke njoftuar se ballafaqimi i Njësisë Speciale Intervenuese po vazhdonte akoma edhe pas disa orësh.
“Në këtë betejë po mbrohet Kosova e pavarur”, shtonte kryeministri.
S’kaloi as një muaj e njëjta njësi u desh të dal në protesta për të kërkuar kushte më të mira pune.
“Në këtë rrugëtim jemi absolutisht bashkë”, u pati thënë Kurti në konferencë me 24 shtator, por i la vetë para dyerve të qeverisë.
Pranoi takim vetëm me 15 nëntor.
Albanian Post ka publikuar ekskluzivisht se çfarë ka ngjarë në këtë takim, ku Kurti është treguar shpërfillës, ofenduese dhe me fjali brutale ka përshkruar triumfin e policisë së Kosovës, duke u thënë se “nuk keni bërë gjë me 24 shtator, i keni vrarë tre veta me snajper nga distanca”.
Dhe kur policët ishin shprehur se ata luftojnë prapë për Kosovën, ai u tha se ajo që ndodhi në Banjë të Zveçanit nuk ishte luftë meqë s’pati shumë të vdekur, duke e konsideruar të pamjaftueshme vdekjen e Bunjakut.
Madje, normale, pasi “me vdek një polic është normale që fëmijët tanë të jetojnë të sigurt”.
Qasja brutale, deluzive dhe jashtë çdo konture të normalitetit për Albin Kurtin nuk është e re. Ai quante kriminelë e bashkëpunëtorë të Serbisë këdo që i dilte përpara sa ishte në opozitë. Por, riprodhimi i të njëjtës nga pozita e kryeministrit e bënë atë të frikshëm dhe tejet shqetësues.
Ai nuk ka brengosje as për rregullat ligjore, as për ato morale. Fuqia e tij elektorale ia ka krijuar një ide të shkeljes së kufijve pa pasoja dhe ndrydhje të normave demokratike mbi të cilat është ndërtuar shteti.
Ndryshe nga sa ishte në opozitë që rreziku konsistonte në karakterin e tij, Kurti tash është i pajisur edhe me mjetet që ia mundësojnë zgjatimin e brutalitetit dhe institucionalizimin e mërisë.
Kornizat shtetërore që ia përmbanin prirjet autokratike më parë kanë filluar të dobësohen dhe fakti që nuk e ka askë afër që guxon t’ia thotë të vërtetën e lë atë pa levë ekuilibri në paradën e dërrmimit shoqëror.
Kur qasja e tij aspak demokratike mbetet e lirë për të shtrirë idetë e tij ekstreme në perspektivë, e ardhmja nënkupton fuqi për kryeministrin si në paramendimet e Kurtit.
Vazhdimi i kësaj politike pa pengesa, me shumë gjasë do përbëjë fundin e rregullimit institucional siç e njohim.
Sinjalet janë aq shumë dhe janë aq shumë të frikshme. Që nga ardhja e tij e dytë si kryeministër ai s’ka pushuar së akuzuari kundërshtarë, shpikur fakte, mohuar të vërteta konkrete dhe krijuar të vërteta alternative.
Kurti është gjithçka që përbënte shqetësim për skeptikët dhe shumë më tepër.
Derisa në mandatin e parë ishte disi i kufizuar nga bashkëpunimi me LDK-në, më këtë mandat të dytë ai ka rrethuar vetën me njerëz pa principe, pa kurrfarë ndërgjegje, që janë krejtësisht tolerantë ndaj çmendurive të tij dhe vetëm luajnë rolin e kukullave që kanë të paracaktuar rrugëtimin politik, i cili mund të ndërpritet nga omnipotenti Kurti.
Persona si Kurti, me tendenca të qarta autokratike dhe populiste e kanë të pamundur të operojnë brenda logjikës së kompromisit që demokracia e ka si parakusht. Për ta nuk ka marrje vesh, as marrëveshje. Ka fitore ose humbje. Dhe meqë operojnë me ekstreme të tilla, ku ose humbet ose fitohet edhe mjetet janë në përputhshmëri drejtvizore me ekstremitetin e përfundimeve.
Albin Kurti më as nuk po fshihet. Ai po na tregon saktësisht se si e mendon vetën dhe si i mendon të gjitha grupet që i vihen kundër, qoftë edhe vetëm për mirëqenien e tyre, si në rastin e policisë.
Kur thotë si në intervistën në Rubikon se për të nuk është në rregull që Gjykata Kushtetuese që ka vetëm 9 gjyqtarë t’i dal kundër këtij që ka 400 mijë vota, merreni për fjale.
Shumica është e vërteta, pohon Kurti dhe shumica është ai. Ai është e vërteta, në mendjen e tij.
Ai nuk i ndryshon më vetëm fjalët, por ka filluar t’i jap vetës të drejtë ta ndryshojë edhe kuptimin e fjalive. Një fjali nënkupton diçka në një moment dhe diçka tjetër në një moment tjetër, nëse ashtu thotë Kurti. E vërteta ri-interpretohet sa herë deklasifikohet gënjeshtra e kryeministrit.
Si çdo populist Kurti nuk do linja të mesme dhe pengesa në mes të Tij dhe Popullit.
Ai do kërkojë vazhdimisht ta zgjerojë pushtetin në kurriz të dobësimit të balancave duke e forcuar ekzekutivin dhe dërrmuar shtyllat e tjera mbi të cilat qëndron demokracia edhe ashtu filloriste e Kosovës.
Pengesat e vetme në këtë rrugëtim anti-demokratik të tij nuk kanë qenë shtrëngimi për të mos deformuar, por paaftësia e njerëzve rreth tij për ta kuptuar, njëjtë siç sot paaftësia e njerëzve larg tij që nuk e kupton rrezikun që vjen me të.
Derisa Kurti po perfeksionon metodat për të shtrirë pushtetin personal, në Kosovë po humbet vetëdija kolektive për ta kuptuar këtë rrugëtim që tashmë as nuk po e fsheh.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com