Petkoviç pas takimit me Lajçak-un: Biseduam për draft-statutin, veçanërisht pjesën që ka të bëjë me pushtetin ekzekutiv
![](https://albanianpost.com/wp-content/uploads/2021/07/46063_petarpetkovic-direktorka_f.jpg)
Drejtori i të ashtuquajturës “Zyrë për Kosovës” në Qeverinë e Serbisë, Petar Petkoviç, ka thënë se në takimin që ka pasur në Bruksel me të Dërguarin Special të Bashkimit Evropian për dialogun Kosovë-Serbi, Miroslav Lajçak, kanë diskutuar për hartimin e statutit të Asociacionit të Komunave me Shumicë Serbe, “si hapi i parë konkret” drejt formimit të këtij mekanizmi.
Në një prononcim për gazetarët pas takimeve në Bruksel, Petkoviç ka falënderuar “ekspertët” që ishin pjesë e delegacionit të tij, të cilët, sipas tij, “janë dëshmi se Beogradi i qaset dialogut në mënyrë të përgjegjshme”.
“Ata folën qartë për të gjitha aspektet e draft-statutit, veçanërisht për pjesën që ka të bëjë me pushtetin ekzekutiv, në radhë të parë planifikimin hapësinor, shëndetësinë, arsimin, zhvillimin ekonomik dhe se financohet nga Beogradi”, ka thënë Petkoviç, transmetojnë mediat serbe.
Ai ka theksuar se statuti i këtij mekanizmi “është shumë i rëndësishëm”, pasi që, sipas tij, “përfaqëson shtyllën kurrizore të Asociacionit dhe gjithçka duhet të jetë në përputhje me Marrëveshjet e vitit 2013 dhe 2015”.
“Pas më shumë se pesë orësh bisedime që patëm sot në Bruksel, kthehemi me bindjen se përmes dialogut dhe zgjidhjeve kompromisi mund të arrijmë përparim në normalizimin e marrëdhënieve ndërmjet Beogradit dhe Prishtinës”, shtoi.
Në rend dite, siç ka theksuar ai, ka qenë edhe energjia dhe çështja e personave të pagjetur, ku ka thënë se pret “përparim në kë këto tema”.
“Tani na duhet një lloj plani veprimi për të bërë të gjallë Deklaratën e nënshkruar. Pres që grupi i punës dhe gjithçka e nevojshme të ndodhë në periudhën në vijim”.
“Kur bëhet fjalë për energjinë, ka njerëz nga Elektrosever dhe EPS. Pres që të ndërmerren hapat e ardhshëm për sa i përket marrëveshjeve të arritura në kuadër të udhërrëfyesit. Sapo të ndodhë kjo, do t’ju informojmë”, shtoi Petkoviç.
Pos këtyre, korrieri i propagandës serbe, ka thënë se në këtë takim ka theksuar “rëndësinë” e mbajtjes së zgjedhjeve parlamentare serbe në Kosovë, që pritet të mbahen më 17 dhjetor.
Nga ana tjetër, zëvendëskryeministri i Kosovës, Besnik Bislimi, në një prononcim për media pas takimit me Emisarin Special të Bashkimit Evropian (BE) për dialogun Kosovë-Serbi, Miroslav Lajçak, të enjten në Bruksel, ka thënë se në këtë takim nuk është diskutuar për draft-statutin e Asociacionit të Komunave me Shumicë Serbe, sepse nuk ka pasur nevojë, ndonëse ka qenë në agjendë.
Ai ka thënë se pa nënshkrimin e Marrëveshjes Bazë (Bruksel, 27 shkurt) dhe Aneksit të Implementimit (Ohër, 18 mars), s’do të nis puna për themelimin e Asociacionit të Komunave me Shumicë Serbe, duke theksuar sërish pozicionin e Kosovës, përkundër se është pranuar në parim nga kryeministri kosovar, Albin Kurti, në takimin me liderët evropianë më 26 tetor.
“Ne i kemi treguar Lajçakut se kemi pozicion të qartë… Jemi të gatshëm ta pranojmë dokumentin e plotë, ta nënshkruajmë së bashku me dy dokumentet tjera. S’kemi pasur nevojë për sqarime shtesë nga BE-ja, prandaj edhe s’kemi diskutuar”, ka thënë ai, duke shtuar se ka pasur gatishmëri të madhe të Lajçakut që t’i akomodojë kërkesat e palës kosovare.
Bislimi ka vlerësuar ndër të tjera se pika më e rëndësishme e takimit ka qenë diskutimi për finalizimin e sekuencimit të Marrëveshjes Bazë dhe Aneksit të Implementimit, derisa ka shtuar se draft-statuti i prezantuar nga emisarët perëndimorë më 21 tetor ka pasur “kujdes të shtuar” për Kushtetutën e Kosovës, por fjalën e fundit do ta ketë Gjykata Kushtetuese.
“Kemi pasur drafte që kanë qarkulluar, por mund të themi që drafti që i është dorëzuar Kosovës nga miqtë tanë të BE-së dhe SHBA-ve, gjatë përgatitjes së neneve të veta, ka pasur një kujdes të shtuar për provizionet kushtetuese të Kushtetutës së Kosovës”, ka shtuar ai, derisa ka njoftuar se janë diskutuar edhe çështje tjera në kuadër të dialogut Prishtinë-Beograd.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com