“Kur e kemi bo çmimin…” – Intervista e biznesmenit Nezir Idrizi që shpalos më shumë dhe komplikon më tepër skandalin e Qeverisë me Rezervën Shtetërore
![](https://albanianpost.com/wp-content/uploads/2023/08/xxxx.jpg)
Afera e grurit, vajit dhe sheqerit nga Qeveria e Kosovës, të cilën po e heton Prokuroria Speciale dhe për të cilën tashmë janë arrestuar tre persona, me gjasë ka edhe shumë për të dhënë.
Emri i fundit që u zbulua në këtë afër është Nezir Idrizi, një person që për herë të parë u bë publik nga avokati i Ridvan Muharremit, i arrestuar për ndihmë në kryerjen e veprës, meqë si person privat kishte negociuar në emër të Qeverisë së Kosovës për rezervat shtetërore.
Derisa fillimisht mendohej se Muharremi është ndërmjetësuesi i vetëm mes qeverisë dhe biznesmenëve të dyshimtë në Turqi e Poloni, avokati Mahmut Halimi tregoi në emisionin Debat Plus, se një tjetër njeri i përfshirë është Nezir Idrizi.
Zbulimi i emrit të tij, zbuloi gjithashtu se Idrizi është bashkëpartner me polakun që mori paratë nga Qeveria e Kosovës për të sjellë vaj e sheqer dhe u zhduk, Tomasz Tokarski.
Tokarski ka dy kompani në Kosovë, “XANTO KOS L.L.C” dhe “Xanto Clinic L.L.C”.
Idrizi nuk është partnerë në kompaninë e parë, por në të dytën, ku 60 për qind të aksioneve i ka polaku Tokarski dhe pozitën e drejtorit, kurse 40 për qind i takojnë Idrizit dhe pozita e drejtorit menaxhues.
Megjithatë, nëse shikohen të dhënat në ARBK, të dy kompanitë kanë të regjistruar adresë identike dhe gjithashtu të dy kompanitë janë të regjistruara brenda gjashtë ditësh.
Edhe Xanto Clinic L.L.C që është e hapur me 8 dhjetor të vitit 2021 edhe XANTO KOS L.L.C që është e regjistruar me 14 dhjetor 2021, kanë për adresë “Prishtinë, Rruga Vicianum, nr 31”.
Gjithashtu numri kontaktues i biznesit për të dy kompanitë është i njëjtë, “+38345303800”. Dy bizneset kanë edhe e-mail të njëjtë.
Nëse Idrizi s’ka asnjë lidhje me kompaninë XANTO KOS, atëherë çfarë bëjnë të dhënat identike si të kompanisë tjetër të regjistruara në Agjencinë e Regjistrimit te Bizneseve të Kosovës?
Pas publikeve nga Albanian Post, Idrizi është shfaqur në një intervistë, në të cilën paraprakisht ka kërkuar që t’i mbulohet fytyra dhe ka pranuar që Tokarskin e ka mik dhe bashkëpunëtor.
“Tokarski është një mik i imi, një bashkëpronar në kompaninë që e kemi në Kosovë, po unë s’jam bashkëpronar me kompaninë në Poloni”, tha ai në një intervistë për mediumin Nacionale.
Ekskluzive: Rozeta Hajdarit ia zhvati afër 600 mijë euro mashtruesi polak Tomasz Tokarski
Më pas pohoi se angazhimi i tij ishte vetëm në cilësinë e përkthyesit dhe nuk di shumë, derisa filloi të tregonte se dinte gjithçka, edhe komunikimin zyrtar me e-maila në mes të Ministrisë së Industrisë, Ndërmarrësisë dhe Tregtisë dhe Tokarskit.
“Vaj dhe sheqeri nuk kanë ardhur se ka pasur vonesa, zotëri Tokarski ka me ua shpjegu frik”, tha Idrizi, pasi fillimisht deklaroi se ai ishte veç përkthyes dhe kaq.
Më pas Idrizi filloi duke e arsyetuar biznesmenin polak Tokarski. Tha se çmimi më të cilin pranoi ta sillte vajin dhe sheqerin në Kosovë ishte tejet i ulët, madje as nuk ia vlente fare, por polaku e bëri për shkak të Kosovës.
Ishte pikërisht ky moment, kur derisa fliste për vajin, Idrizi e tradhtoi tregimin dhe përfshiu vetën përtej të qenurit përkthyes.
“Çmimin të cilin e kemi bo të vajit… se tash po flitet për çmimin e grunit që e ka tejkalu bursën, çmimi i vajit është marrë mund ta verifikoni nën vlerë të bursës”, deklaroi Idrizi duke e bërë edhe veten pjesë të negociatorëve për çmimin e vajit.
Sa për atë se ku e gjeti ministria Tokarskin, Idrizi e ka pranuar se ishte ai që ia propozoi fillimisht Ridvan Muharremit dhe më pas Muharremi Qeverisë.
Në shumicën e intervistës së tij Idrizi ishte i paqartë, por një gjë garantoi, se në këtë rast s’ka korrupsion.
“Në rastin e vajit edhe sheqerit, nuk ka korrupsion as kurgjo”, pohoi me bindje, edhe pse nuk arsyetonte dot se si u bë që paratë u paguan dhe malli tash e po bëhen dy vjet nuk po vjen.
Përkundër se veç në cilësinë e përkthyesit, Idrizi e dinte edhe komunikimin e më pastajmë që kishte ndodhur mes Tokarskit dhe ministrisë në Kosovë.
“Tokarski ka mbajtur komunikim me e-mail me qeverinë. Kur është komplikuar situata për shkak të çmimeve dhe transportit… marrëveshja e Tokarskit ka qenë me një kompani ukrainase, bile fillimisht oferta për sheqer e për vaj ka qenë për 9 mijë tonë vaj dhe 10 mijë ton sheqer”.
Përkthyesi ishte në dijeni po ashtu edhe pse është vonuar malli.
“Është vonu sepse është tejkaluar kostoja e transportit mbi 100 mijë euro. Tokarski ka kërkuar t’i kthej të hollat. Ai ka bërë kërkesë t’i kthejë, nuk i është aprovuar. Pastaj, ka kërkuar kohë, t’i shtyhet afati”.
Në fund, Idrizi pohoi se qëllimi i Tokarskit ishte shumë i mirë dhe gati se bamirës.
“Tokarski ka pasur qëllime të mira.. …okej Kosova si Kosovë, ndoshta po e lë një gjest të mirë, por ju kthy e kundërta”.
Idrizi përmendi shkarazi edhe një produkt farmaceutik, me të cilin, siç shkruajnë mediat në Poloni, Tokarski ka mashtruar qytetarët atje duke i bërë të investojnë dhe më pas ua ka avulluar të hollat – bëhet fjalë për një milion euro
Ekskluzive: Rozeta Hajdarit ia zhvati afër 600 mijë euro mashtruesi polak Tomasz Tokarski
Në fund, Idrizi u shpreh i dëshpëruar që shkoi siç shkoi puna, meqë “zoti Tokarski ka qenë i interesuar të bëjë investime këtu”.
“Tokarski ka një produkt ma në formë kohëve të fundit, është shumë i kushtueshëm, Tokarski ka pasur probleme edhe me lobin farmaceutik”, tregoi.
E gjithë saga me mallrat e rezervës shtetërore filloi kur u kuptua se sasi të caktuara të mallrave të ndryshme të paguara nga shteti i Kosovës nuk kanë ardhur fare.
Disa përgjime të publikuara nga mediumi Nacionale, ku dëgjoheshin zyrtarët e MINT tek flisnin për veprime jo ligjore, bëri që të fillojë një hetim nga prokuroria që rezultoi me tri arrestime – dy zyrtarë të ministrisë, Hafiz Gara dhe Irfan Lipovica, gjithashtu dhe një person i afërt me Albin Kurtin, Ridvan Muharremi.
Gara e Lipovica u arrestuan pasi prokuroria kuptoi se të dy kishin përpiluar një kërkesë të kundërligjshme për shmangie nga procedurat e prokurimit gjatë blerjes së mallrave nga ministria, përkundër se e dinin se ajo kërkesë përbënte shkelje ligjore.
Më pas e njëjta ishte bërë vendim i kundërligjshëm kur u aprovua dhe u nënshkruar nga kryeministri i Kosovës, Albin Kurti.
Në anën tjetër Muharremit iu bastis shtëpia, një lokal dhe u arrestua ai vetë.
Deri javën e kaluar, besohej se ishin këta personat, bashkë dhe me ministren Rozeta Hajdari që ishin të përfshirë në këtë skandal, por avokati i Muharremit në një emision në Debat Plus shpalosi edhe një emër të ri që kishte luajtur rolin e ndërmjetësuesit – Nezir Idrizin.
Pas hulumtimeve nga Albanian Post, u kuptua se Idrizi ishte bashkëpunëtor i afërt dhe bashkëpronar në një kompani me polakun Tokarski.
Aktualisht prokuroria po i vazhdon hetimet për rastin, derisa Qeveria, vetë kryeministri Kurti dhe partia Lëvizja Vetëvendosje, përkundër se kanë pranuar që sasia e mallit në vlerë prej 600 mijë euro po mungon, kanë deklaruar se e gjitha është veç përndjekje politike nga ish-regjimi përmes Prokurorisë së Kosovës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com