![](https://albanianpost.com/wp-content/uploads/2023/08/jk.png)
Përleshjet e dhunshme shpërthyen në periferi të kryeqytetit grek, Athinë, gjatë natës mes të hënës dhe të martës mes tifozëve të Dinamo Zagrebit dhe vendasve të AEK-ut. Si pasojë një tifoz ka mbetur i vdekur dhe disa të tjerë janë plagosur.
Përplasjet e dhunshme midis grupeve ultras çuan në afro 100 arrestime. Një mbështetës grek i klubit të futbollit AEK është vrarë me thikë, sipas policisë lokale. Përleshjet lanë të paktën tetë persona të plagosur, tre grekë dhe pesë kroatë.
Ndeshja e parë e Champions League do të zhvillohet të martën në mbrëmje në stadiumin AEK në “Nea Filadelfia”, një periferi e Athinës.
“Incidente të rënda ndodhën jashtë stadiumit ‘Nea Filadelfia’. Një i ri grek u godit me thikë për vdekje”, tha policia greke. Mes të plagosurve është edhe një i mitur që u godit me gur në kokë, tha televizioni publik “ERT”. Ata janë ende në spital.
Sipas policisë, viktima 22-vjeçar i plagosur me thikë u shtrua në spital para se t’i dorëzohej plagëve të marra gjatë natës.
Oficerët grekë bënë 96 arrestime deri në orët e para të mëngjesit të së martës.
Një hetim është hapur dhe të arrestuarit do të dëgjohen nga prokurori të martën, sipas agjencisë greke të lajmeve “Ana”.
Rreth 100 huliganë nga klubi kroat ishin të pranishëm në kryeqytetin grek, shtoi ajo.
Dhuna vdekjeprurëse në futboll ka goditur edhe më parë Greqinë. Në shkurt 2022, një tifoz 19-vjeçar, Alkis Kampanos, u rrah dhe u godit me thikë për vdekje në qytetin verilindor të Selanikut, pas një ndeshjeje midis dy klubeve rivale greke, PAOK FC dhe Aris FC.
Korrikun e kaluar, shtatë nga dymbëdhjetë të pandehurit në këtë rast u shpallën fajtorë për vrasje me dashje dhe u dënuan me burgim të përjetshëm.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com