![](https://albanianpost.com/wp-content/uploads/2023/07/mu.jpeg)
Kryeministri i Republika Srpska – entiteti serb në Bosnje e Hercegovinë – Radovan Vishkoviç, ka kërkuar largimin e anëtarit boshnjak të presidencës së BeH, Denis Beçiroviç.
“Jam duke kërkuar zëvendësuesin e Denis Beçiroviç-it dhe me të vërtetë mendoj se ai e teproi. Unë jam duke nisur një iniciativë për të zëvendësuar Beqiroviç-in. Kush është ai që kërkon largimin e Presidentit të Republika Srpska, Milorad Dodik”, tha Vishkoviç, pas kërkesave të Beçiroviç-it për shkarkimin e presidentit ultra-nacionalist të RS-së Dodik, për shkak të veprimeve të tij destabilizuese në BeH.
Sipas tij, Beçiroviç “nuk e ka zgjedhur Dodik-un, prandaj nuk mund ta zëvendësojë atë”.
Ndryshe, anëtari boshnjak i Presidencës së BeH-së, Denis Beçiroviç, të martën në një bisedë me ministrin Punëve të Jashtme të Britanisë së Madhe (Sekretarin e Jashtëm), James Cleveley në Londër, se Presidenti i Republikës Srpska, Milorad Dodik, duhet të shkarkohet para se të shkaktojë de-stabilizimin e BeH dhe të të gjithë rajonit.
Tutje, Beqiroviç theksoi se “është më mirë të zëvendësohet Dodik, sesa të lejohet që politika e tij të kërcënojë ekzistencialisht qytetarët dhe popujt e Bosnjës dhe Hercegovinës”.
Ndërsa, Përfaqësuesi i Lartë në Bosnje e Hercegovinë, Christian Schmidt, kishte vendosur me 1 qershor, lidhur me ligjin për moszbatimin e vendimeve të Gjykatës Kushtetuese të BeH në territorin e Republikës Srpska, të miratuar nga Asambleja Kombëtare e RS, bazuar në kompetencat e Bonit (të parapara në Marrëveshjen e Dejtonit, më 1995, e cila i dha fund luftës në BeH)
Ai ka vendosur se nuk do të hyjë në fuqi ligji për mospublikimin e vendimeve të Përfaqësueses së Lartë, i miratuar nga Asambleja Kombëtare e Republikës Srpska, si dhe ligji për moszbatimin e vendimeve të Gjykatës Kushtetuese të Bosnjë e Hercegovinës.
“Vendimi i Asamblesë Kombëtare të Republikës Srpska cenon drejtpërdrejt rendin kushtetues të BeH-së, dhe rrjedhimisht Marrëveshjen e Dejtonit. Institucionet e entitetit nuk kanë të drejtë të devijojnë nga vendimet e institucioneve shtetërore, si dhe të devijojnë nga institucionet e bazuara në Kushtetutën e BeH-së”, theksoi Schmidt, duke komentuar ligjin për moszbatimin e vendimeve të Gjykatës Kushtetuese të BeH për territorin e RS.
“Pasojat më të mëdha të aventurizmit të tillë të liderëve politikë në RS do t’i vuajnë banorët e RS-së”, potencoi ai.
Po ashtu, Përfaqësuesi i Lartë njoftoi se ka marrë një vendim për ndryshimet në Kodin Penal, i cili sanksionon sulmin ndaj rendit kushtetues në Bosnje dhe Hercegovinë.
“Më lejoni të bëj një paralajmërim. Të gjitha opsionet janë në tryezë dhe ju të gjithë e dini shumë mirë se çfarë përfshijnë fuqitë e Bonit në dispozicionin tim”, paralajmëroi Schmidt.
Në konferencën për shtyp që ka mbajtur ai nuk ka specifikuar saktësisht se cilat dispozita të Kodit Penal të Bosnjë e Hercegovinës po ndryshon, por mediat boshnjake supozojnë se bëhet fjalë për artikuj që flasin për sulm ndaj rendit kushtetues, për tentativat për të shkëputur me forcë një pjesë të vendit dhe për dobësimin e fuqisë ushtarake të shtetit.
DASH: Marrëveshja e Dejtonit nën kërcënim, do t’i mbajmë përgjegjës individët anti-Dejton
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com