![](https://albanianpost.com/wp-content/uploads/2023/06/230630085620-02-france-shooting-gallery.jpg)
Franca po përjeton protesta të shumëfishta në gjithë vendin pas vrasjes së një 17-vjeçari me origjinë arabe nga një polic, ku pavarësisht arrestimit dhe kërkesë-faljes së këtij të fundit për aktin, qytetarët janë dergjur në sheshe e rrugë, për të demonstruar dhunshëm.
Tym e flakë ka qenë situata gjatë natës së fundit në qytete të mëdha si Paris, Marseille, Bordeaux apo Lyon, ku mbi 800 persona janë arrestuar në gjithë vendin.
Protestat tronditin Francën pas vrasjes të një adoleshenti nga policia
Kolapsin më të madh gjithsesi, e përjetojnë qytetarët, për të cilët transporti urban dhe ndërurban do të ndërpritet në orën 21:00 për të dytën natë radhazi, prej frikës se mos protestat do të vijojnë të mbeten të dhunshme.
Kështu ka bërë me dije presidenti francez, Emmanuel Macron, gjatë një adresimi për popullin e tij, ku ka kërkuar të ketë qetësi dhe maturi, e jo akte “të papranueshme e pajustifikueshme”.
Ai e ka dënuar ashpër dhunën e ushtruar nga dhjetëra mijëra qytetarë në rrugë, përfshi edhe ndaj mbi 40 mijë forcave policore të nxjerra për të ruajtur rendin.
Po ashtu, ka bërë me dije edhe se forca shtesë pritet të zbresin natën e sotme në qytetet kryesore franceze.
Një referencë disi të çuditshme gjithsesi, Macron e ka bërë kur u ka kërkuar prindërve që të mbajnë fëmijët e tyre brenda shtëpive, pasi aspekte si videolojërat, ndërveprimi në media sociale dhe vrojtimi i situatave në kohë reale, i ka bërë ata të dalin nga vetja dhe të kthehen në persona të dhunshëm në rrugë.
“Ata të cilët po marrin pjesë në demonstrata janë ‘shumë të rinj’”, u adresua ai në një konferencë për media, duke thënë se adoleshentët po “intoksikohen” dhe inkurajohen të kopjojnë sjellje jashtë rregullave.
Sipas një njoftimi zyrtar nga ministri i Brendshëm, Gerald Darmanin, të gjitha shërbimet e transportit do të ndalen në orën 21:00 dhe do të rinisin ditën e nesërme, duke e vendosur kështu shërbimin në “karantinë”.
Gjithashtu, ai ka apeluar të mos ketë më shitje fishekzjarrësh apo lëndësh të tjera piroteknike dhe kimike, që të shmangen incidentet e dhunshme.
Mjete të blinduar dhe të armatosur mendohet se do të përdoren gjithashtu gjatë kësaj nate në Francë, për të përmbajtur turmat.
Polici që qëlloi adoleshentin francez akuzohet për vrasje, burgoset
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com