Kurti i bashkohet “Paradës së Krenarisë”: Do të bëj maksimumin që Kodi Civil herën tjetër të kalojë në Kuvend
![](https://albanianpost.com/wp-content/uploads/2023/06/lgbt.jpg)
Kryeministri i Kosovës, Albin Kurti, i është bashkuar “Paradës së Krenarisë” që është duke u mbajtur këtë të shtune në sheshin e Prishtinës.
Në fjalën e tij para gazetarëve Kurti tha se arsyeja që ai është prezent për shkak se “besoj në të drejtat e njeriut, besoj që të gjithë duhet të jemi të barabartë, dhe secili duhet të ketë të garantuar dhe të mbrojtur dinjitetin dhe integritetin”.
“Për komunitetin LGBTQI+, shteti dhe shoqëria duhet t’i mbrojë dhe duhet të mësojë për ta. Me këtë rast unë shpreh indinjatën time për numrin e madh të abuzimeve kërcënimeve dhe të diskriminimeve që përjetojnë ky komunitet”, shtoi ai.
Tutje, kreu i ekzekutivit theksoi se “ju e dëgjuat se si në mënyrë krenare bënë thirrje për barazi dhe liri”, dhe shtoi se “aty ku thërrasin për barazi dhe liri unë jam aty, sepse republika jonë demokratike ndryshe s’bënë”.
Kodi Civil i cili parasheh martesat e seksit të njëjtë nuk kishte kaluar në Kuvend, kjo për shkak të kundërshtimeve të kundërshtimeve të disa deputetëve, mirëpo Kurti shprehet optimist se herën e ardhshme do të miratohet.
“Ne do të bëjmë maksimumin që Kodi Civil herën e ardhshme të kalojë suksesshëm në parlament”, potencoi ai.
Motoja e këtij marshi është “T’du qashtu qysh je”.
Po ashtu, me një pankartë “Diplomatët për barazi”, paradës iu kanë bashkëngjitur edhe ambasadorët e huaj në Kosovë si ai i Francës, Oliver Guerot, shefi i Zyrës së Bashkimit Evropian, Tomas Szunyog, si dhe ambasadoi italian, Antonello De Riu.
Përveç Kurtit, janë duke marrë pjesë edhe ministri i Shëndetësisë, Arben Vitia, Kryetari i Prishtinës, Përparim Rama, shefja e grupit parlamentar të Lëvizjes Vetëvendosje, Mimoza Kusari-Lila, si dhe shumë personalitete të tjera, duke i dhënë kështu mbështetjen e tyre komunitetit LGBTQI+.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com