![](https://albanianpost.com/wp-content/uploads/2023/06/VUCICESCOLAJCAK.jpg)
Ka nisur takimi mes presidentit të Serbisë, Aleksandër Vuçiç dhe Emisarit Special të Bashkimit Evropian për dialogun Kosovë-Serbi, Miroslav Lajçak, i cili po shoqërohet nga i dërguari i posaçëm i Shteteve të Bashkuara për Ballkanin Perëndimor, Gabriel Escobar, ku do të bisedohet për gjendjen në veri të Kosovës.
Takimi filloi pak pas orës 19:00, raportojnë mediat serbe, ndërsa në këtë takim që po zhvillohet në vilën “Mir” në Beograd, të pranishëm janë edhe shefi i zyrës së BE-së në Serbi, Emanuele Giaufret dhe ambasadori i SHBA-ve atje, Christopher Hill.
Ndryshe, diplomati sllovak arriti në Kosovë të hënën në mbrëmje bashkë me diplomatin amerikan. Ata fillimisht kanë zhvilluar një takim me kryeministrin e Kosovës, Albin Kurti, kurse të martën patën takime edhe me presidenten Vjosa Osmani dhe opozitën kosovare.
Qetësimi i situatës në pjesën veriore të Kosovës, mbajtja e zgjedhjeve të reja lokale dhe kthimi në dialogun për normalizimin e marrëdhënieve Kosovë-Serbi ishin tri kërkesat e përbashkëta të të dërguarit evropian dhe atij amerikan për dalje nga kriza.
Autoritetet e Kosovës kanë shprehur gatishmëri që t’i dëgjojë kërkesat e serbëve lokalë dhe të pajtohen për rizgjedhje në Leposaviq, Zveçan, Zubin Potok dhe Mitrovicë të Veriut, pas tensioneve të fundit atje. Por me kusht që serbët të mos i bojkotojnë ato si herën e fundit.
Ndryshe, tensionet janë kthyer sërish në veri të Kosovës, pas zgjedhjeve lokale të 23 prillit për katër kryetarët e komunave në veri të vendit, përkatësisht në Leposaviq, Zveçan dhe Zubin Potok – të cilat i fituan kandidatët shqiptarë nga Lëvizja Vetëvendosje dhe Partia Demokratike e Kosovës.
Serbët lokalë janë duke protestuar që prej 29 majit në këto komuna të banuara me shumicë serbe, për të kundërshtuar hyrjen e kryetarëve të rinj shqiptarë në objektet komunale. Nga ana tjetër, komuniteti ndërkombëtar ka bërë thirrje të vazhdueshme për marrjen e hapave drejt uljes së tensioneve.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com