Ambasadorët britanikë në Prishtinë e Beograd: Kurti dhe Vuçiç u treguan të guximshëm, tash të lëvizin për ta bërë marrëveshjen realitet
![](https://albanianpost.com/wp-content/uploads/2023/03/Ambasadoret-.jpg)
Ambasada e Britanisë së Madhe në Kosovë dhe ajo në Serbi, nëpërmjet një deklarate të përbashkët në llogarinë në Facebook, të hënën kanë thënë se e mirëpresin pajtimin e arritur në Ohër mes kryeministrit Albin Kurti dhe Presidentit të Serbisë.
Kryeministri Kurti dhe presidenti serb, sipas diplomacisë britanike, kanë bërë hap të guximshëm duke rënë dakord për planin e zbatimit të marrëveshjes për rrugën e normalizimit të marrëdhënieve ndërmjet Kosovës dhe Serbisë.
“Albin Kurti dhe Aleksandër Vuçiç bënë një hap të guximshëm dhe domethënës përpara duke rënë dakord për një plan për zbatim këtë fundjavë. Ne presim – dhe jemi të gatshëm të mbështesim të dyja palët të lëvizin shpejt për ta bërë marrëveshjen realitet”, thuhet në postim.
Kosova dhe Serbia, më 18 mars u pajtuan që të fillojnë zbatimin e Marrëveshjes për normalizimin e raporteve sa më shpejt që të jetë e mundur. Megjithatë, atë nuk e nënshkruan zyrtarisht. Në fakt, kryeministri Kurti ka qenë i gatshëm të nënshkruaj, por presidenti serb ka refuzuar.
Marrëveshja për Aneksin e zbatimit të Marrëveshjes për rrugën drejt normalizimit të marrëdhënieve ndërmjet Kosovës dhe Serbisë, siç vlerësojnë njohësit e së drejtës ndërkombëtare, ndonëse nuk është nënshkruar, është juridiksht e detyrueshme për të dyja palët.
Tash Bashkimi Evropian duhet të gjejë rrugë për t’i bindur palët që ta kuptojnë Marrëveshjen si obligim, dhe t’i implementojnë të gjitha pikat. Në rastin e Serbisë, mendohet të bëhet përmes përfshirjes në kornizën e negociatave të anëtarësimit në BE, ndërsa për Kosovën në Komisionin për Normalizim.
Kryeministri Kurti dhe Aleksandër Vuçiç u pajtuan paraprakisht më 27 shkurt me planin 11-pikësh të Bashkimit Evropian për normalizimin e marrëdhënieve që për diplomacinë perëndimore vlerësohet shumë e rëndësishme dhe një sukses pas agresionit rus në Ukrainë.
Kjo Marrëveshje nuk e përfshinë njohjen reciproke mes të dy vendeve, por kërkon nga të dyja që t’i pranojnë dokumentet dhe simbolet e njëra-tjetrës, përfshirë: pasaportat, diplomat dhe targat e veturave.
Po ashtu, nga palët kërkohet që t’i zbatojnë të gjitha marrëveshjet e arritura deri më tash në dialogun për normalizimin e marrëdhënieve, përfshirë edhe atë për themelimin e Asociacionit të Komunave me shumicë serbe në Kosovë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com