![](https://albanianpost.com/wp-content/uploads/2022/03/Qeveria-e-Kosoves.jpg)
Kryeministri i Kosovës, Albin Kurti, bashkë me ministrin e Financave, Punës dhe Transfereve, Hekuran Murati dhe ministrin e Administrimit të Pushtetit Lokal, Elbert Krasniqi prezantuan para qytetarëve të Pejës buxhetin për vitin e ardhshëm.
Ashtu siç njoftohet nga një komunikatë për media, buxheti që u dedikohet komunave për vitin 2023 parashihet të jetë rreth 100 milionë euro më shumë se sa ka qenë këtë vit, ndërsa buxheti për Komunën e Pejës do të jetë mbi 33 milionë euro.
![](https://albanianpost.com/wp-content/uploads/2022/12/Kutzi-1.jpg)
Gjithashtu, janë planifikuar edhe mjetet për finalizimin e Qendrës Nacionale të Xhudos, sport ky që ka qenë kryefjala e sportit vendor tash e 15 vjet dhe në të cilin janë shënuar suksese historike.
Ministria e Kulturës, Rinisë dhe Sportit ka planifikuar 1.55 milion euro për projekte në këtë komunë, që do t’i shërbejnë sportit dhe rinisë, përveç 6.6 milionë eurove që janë planifikuar për projekte infrastrukturore në Pejë.
“Me buxhetin e vitit 2023, dhe në përputhje me Programin Qeverisës 2021-2025, do të vazhdojmë mbështetjen për arsimin, shëndetësinë, bujqësinë e sigurinë”, u shpreh Kurti para qytetarëve, kumton Zyra për Media.
Ai tha se në kuadër të tij parashihet shtimi i vlerave për investime kapitale, mallra dhe shërbime, që arrijnë vlerën 1.3 miliard euro dhe se kjo do të kontribuojë edhe në shtimin e aktivitetit biznesor dhe rritjen e zhvillimit ekonomik.
Pas fjalës së prezantimit fillestar, kreu i qeverisë së bashku me Muratin dhe Krasniqin, bashkëbiseduan me qytetarët duke iu përgjigjur pyetjeve të tyre dhe duke dhënë detaje shtesë mbi ndarjet buxhetore dhe projektet për vitin tjetër.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com