Sarrazin në Beograd: Kosova është vend stabil, i sigurt dhe me institucione që funksionojnë mirë
![](https://albanianpost.com/wp-content/uploads/2022/09/sarrazin.jpg)
I dërguari Special i Qeverisë Gjermane për Ballkanin Perëndimor, Manuel Sarrazin, në një intervistë për emisionin “Jutro” në “TV Prva” në Serbi, ka thënë se “Kosova është vërtet një shtet që funksionon mirë”.
Siç u shpreh gjermani, në Kosovë ka siguri dhe “funksionojnë institucionet”.
Prandaj, “nuk mendoj se ka shkëndijë të mjaftueshme në Kosovë që situata të shpërthejë”.
Gjithsesi, thotë ai, “mund të ketë zhvillim negativ nëse kët do ta donin vendimmarrësit në Beograd, Mitrovicë apo Prishtinë.
I pyetur nëse pas zgjidhjes së çështjes së Kosovës fshihet modeli i dy Gjermanive, të cilën presidenti serb Aleksandar Vuçiç e quajti “armaturë të re” në procesin e dialogut, ai u përgjigj tërthorazi, duke mos mohuar këtë model.
“Ne në Gjermani nuk na pëlqen kur diplomatët e huaj na thonë se si duhet të diskutojmë. Unë jam gjerman dhe jam krenar për vendin tim dhe jam i lumtur nëse pjesët e mira të historisë sonë mund të përdoren për paqen dhe përparimin dhe pajtimin evropian. Në të njëjtën kohë kemi bërë gabime dhe do të dëshiroja që Serbia dhe Kosova të mësojnë nga përvojat tona”, tha ai.
Sarrazin shtoi se shpreson që parlamenti i ri serb të jetë më i hapur për debate dhe të ketë mendime më të ndryshme, kur komentoi seancën për Kosovën që po zhvillohet në parlamentin e Serbisë.
“Kam qenë 13 vjet deputet i Bundestagut dhe e di sa i rëndësishëm është debati i hapur dhe i lirë në parlament, sepse është një hapësirë e lirë dhe një vend ku ballafaqohen mendimet e ndryshme. Shpresoj që diskutimi për çështjen e Kosovës dhe Serbisë të jetë një gamë e gjerë mendimesh të ndryshme, se parlamenti është vendi ku do të shprehen mendimet”, tha ai duke iu referuar seancës për Kosovën në Parlamentin e Serbisë.
Modeli i “dy Gjermanive”
“Modeli i dy Gjermanive” është modeli me anë të të cilit po parashihet të arrihet një marrëveshje finale mes Kosovës dhe Serbisë.
Faktikisht ky është një tekst/marrëveshje kornizë, i punuar qysh në vitin 2012 të cilin Albanian Post e posedon dhe përbëhet prej 12 pikave.
Ky model nënkupton se Kosova dhe Serbia nuk do të njohin pavarësinë e njëra-tjetrës, por të dyja palët, sipas marrëveshjes, marrin përsipër themelimin e zyrave ndërlidhëse në selinë e qeverisë/zyrave ndërlidhëse në territorin përkatës.
Në këtë marrëveshje thuhet se asnjëra palë nuk duhet të cënojë integritetin territorial dhe njëkohësisht, marrëdhëniet mes tyre duhet të jenë të bazuara në fqinjësi të mirë, gjithnjë përmes zbatimit të plotë të marrëveshjeve të arritura nga ndërmjetësimi i Bashkimit Evropian.
![](https://albanianpost.com/wp-content/uploads/2021/12/Kurti-Vucic-1-1280x720-1-300x169.jpg)
Aty parashihet që mosmarrëveshjet eventuale të zgjidhen me mjete paqsore, sic parashihet edhe me Kartën e Organizatës së Kombeve të Bashkuara.
Po ashtu, aty thuhet se, Kosova dhe Serbia duhet të punojnë së bashku në zbardhjen e fatit të të zhdukurve dhe kthimin e personave të zhvendosur gjatë luftës së fundit në Kosovë.
Sipas këtij modeli, parashihet edhe demarkimi i kufirit mes Kosovës dhe Serbisë, pra për vendosjen e pikave të reja kufitare.
Respektimi dhe garantimi i të drejtave të minoriteteve në të dyja vendet mbetet kusht i arritjes së një marrëveshje të qëndrueshme. Arsimi, kultura, feja, besimet fetare dhe gjuha e bashkësive minoritare do të gëzojnë trajtim të veçantë.
Tutje, siç bënë të ditur teksti i marrëveshjes, Kosova dhe Serbia duhet të mbështesin aspiratat e njëra tjetrës drejt BE-së dhe të harmonizojnë politikat e tyre me standardet e BE-së.
Disa pika të kësaj marrëveshjeje janë parashikuar edhe në Marrëveshjen e Brukselit. Sipas disa informacioneve, aktualisht është duke u punuar për tekstin e zgjidhjes përfundimtare për problemin e Kosovës dhe e cila do të bazohet në këtë model.
Fondacioni gjerman “Konrad Adenauer”, i cili është i afërt me CDU-në dikur në pushtet, të kryesuar nga ish-kancelarja Angela Merkel, qëndronte pas këtij teksti dhe ishte shkruar prej ekspertëve nga Kosova dhe atyre nga Serbia.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com