![](https://albanianpost.com/wp-content/uploads/2022/03/107945-donika-gervalla-sot-do-ta-vizitoje-luginen-e-presheves.png)
“Ne kemi pasur deklaratën e tij që në fillim dhe nuk kemi pasur asnjë arsye që të dyshojmë në deklaratën e ambasadorit Berishaj”, është shprehur zëvendëskryeministrja dhe Ministrja e Ministrisë së Punëve të Jashtme të Kosovës, Donika Gërvalla për rastin e ambasadorit të Kosovës në Kroaci, Martin Berishaj.
Dhe kjo, sipas Ministres, “duke e njohur jo vetëm personalitetin e tij por, duke njohur edhe kontributin e tij të jashtëzakonshëm”.
Se ka zgjedhur t’i besoj ambasadorit verbërisht, Gërvalla e ka thënë duke shtuar faktin se mediet po gabojnë duke raportuar pa pasur kujdes për personalitete të veçanta.
“Nuk jam unë ajo që më takon t’ju tregojë mediave se si duhet të sillen në raport me personalitete dhe përfaqësues të Kosovës. Kjo është një çështje që ju përket mediave ta shqyrtojnë mes vete”, ka thënë Gërvalla në Klan Kosova.
Vendimin për të qëndruar krah ambasadorit Berishaj e mori pasi u konsultuan edhe me shtete të ndryshme.
“Unë e kam lexuar dhe e kam ditur edhe më herët qëndrimin e Malit të Zi rreth ambasadorit Berishaj, sepse vendimin për të qëndruar në krah të ambasadorit Berishaj nuk e kemi marrë “apriori”, ka thënë ajo.
“Por, e kemi marrë duke u bazuar edhe në informacione të shteteve të ndryshme. Prandaj, gëzohem që hap pas hapi edhe opinioni që ka parë një fushatë të jashtëzakonshme denigruese ndaj ambasadorit do të ndërgjegjësohet që vetëm ka qenë e tillë”.
“Pra, ka qenë një fushatë e bazuar në një medium slloven i cili në një fushatë zgjedhore pak ditë para zgjedhjeve ka lansuar një fushatë të tillë”, u shpreh Gërvalla.
Kryediplomatja e Kosovës nuk ka treguar nëse ambasadori Martin Berishaj ishte fizikisht në Kosovë për të raportuar rreth dyshimeve që u ngritën rreth tij për shpëlarje parash në Slloveni.
Media malazeze, Press.co.me, ka publikuar këtë të hënë një lajm se ambasadorit të Kosovës në Kroaci, Martin Berishajt, i janë bllokuar llogaritë bankare në Mal të Zi për shkak të një borxhi, që siç shkruan kjo media, është 30 mijë e 14 euro.
Press shkruan se bllokimi i xhirollogarive po ndodhë pas skandalit të ambasadorit në Slloveni, ku mediat atje raportuan se është i përfshirë në shpëlarje parash.
Në anën tjetër, po këtë të hënë, portali Gazeta Express ka publikuar një lajm, ku thuhet se kanë komunikuar me Prokurorinë Speciale të Malit të Zi dhe se ata kanë njoftuar se pas hetimeve u ka rezultuar se nuk ka prova për ta ndjekur penalisht Martin Berishajn.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com