Macron riemëron partinë për të garuar në zgjedhjet parlamentare

Partia qendrore e presidentit francez Emmanuel Macron, “La République en Marche”, po ndryshon emrin e saj në “Rilindje” pasi ai po përpiqet të fitojë një shumicë qeverisëse në parlament për mandatin e tij të dytë në detyrë.

Riemërtimi i partisë u njoftua pikërisht kur fushata do të fillonte për zgjedhjet parlamentare të qershorit. Macron shpreson të sigurojë një shumicë parlamentare kundër konkurrencës nga një aleancë e re e partive të majta të udhëhequra nga Jean-Luc Mélenchon dhe “National Rally” e ekstremit të djathtë të Marine Le Pen, e cila po kërkon të rrisë numrin e saj të vogël të vendeve.

Emri “Rilindje” do të thoshte “gjithmonë të zgjedhësh iluminizmin mbi obskurantizmin”, tha sekretari i përgjithshëm i saj, Stanislas Guérini, në një konferencë shtypi në Paris. Grupi i Macron kishte përdorur më parë emrin “Rilindja” gjatë fushatës së tij zgjedhore evropiane në 2019-ën.

Ndryshimi i emrit synonte asokohe të ndihmonte partinë e Macron të fitonte terren në qeverisjen vendore, gjë që nuk ka arritur ta bëjë gjatë pesë viteve të fundit.

Macron kishte krijuar lëvizjen politike “En Marche!” (në lëvizje) në vitin 2016 kur ishte ministër i Ekonomisë, si mjet për ofertën e tij presidenciale në 2017-ën. Ajo u klasifikua si “as majtas as djathtas” dhe u prezantua në atë kohë si qëllimisht jokonvencionale. Ai përdorte inicialet e Macron-it, EM, dhe kishte një logo të shkruar me dorë nga vetë Macron-i, pa asnjë ngjyrë specifike, ndryshe nga ngjyrat e ngurtë të sistemit të vjetër të partisë.

“En Marche” u riemërua më pas “La République En Marche” – Republika në lëvizje – për zgjedhjet parlamentare të 2017-ës, ku Macron fitoi shumicën.

Në zgjedhjet parlamentare të muajit të ardhshëm, partia e re e “Rilindjes” do të bashkohet me dy parti të tjera centriste: aleatët e saj tradicionalë në partinë “MoDem”, e cila mbështeti Macron në zgjedhjet presidenciale, si dhe partinë e re “Horizont”, të krijuar nga ish-kryeministri Édouard Philippe. Ata do të bëjnë një koalicion nën siglën “Ensemble” (së bashku).

François Bayrou, kreu i partisë “MoDem”, tha në konferencën për shtyp në Paris se koalicioni i qendrës ndante një ndjenjë të “seriozitetit” të gjendjes aktuale të “ndarjeve” politike në Francë. Ai tha se idetë e partive opozitare ishin “më radikale” dhe “më të rrezikshme” për Francën dhe Evropën.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.