82% e të rinjve shqiptarë parapëlqejnë të kryejnë studimet e larta

Në Shqipëri dhe Rajonin e Ballkanit – në shumicën dërrmuese të rasteve – të rinjtë preferojnë që të kryejnë studimet e larta dhe të zhvillohen në karrierë.

Rreth 81.9 për qind e të rinjve në Shqipëri dhe në Rajon rezulton se duan të përfundojnë studimet e larta, sipas një ankete të Fondit Evropian të Trajnimeve, pjesë e Bashkimit Evropian.

Vetëm 2.98 për qind preferojnë arsimin fillor, 8.9 për qind arsimin e mesëm dhe 6.5 për qind nuk e kanë të qartë se si do të vijojë karriera e tyre mësimore.

Gati 82 për qind e të rinjve kanë thënë se synojnë të përfundojnë një nivel të arsimit të lartë – ku përfshihen studimet me cikël të shkurtër bachelor, master, doktoratura ose ekuivalentët e tyre.

Nga adoleshentët shqiptarë që duan arsimin e lartë, 11.4 për qind e tyre duan vetëm studimet bachelor, 34,1 për qind duan edhe studimet master dhe 27.3 për qind duan edhe doktoraturën.

Sakaq, synimet për nivelet e arsimit të lartë të të rinjve shqiptarë janë të ngjashme me rajonin përveçse në Rumani ku vetëm 5,5 për qind e të rinjve synojnë doktoraturën.

Pjesëmarrësit në anketë dhe në fokus-grupe përmendën se të rinjtë përballen me pritshmëri të mëdha nga familjet dhe shoqëritë e tyre.

Ndaj dhe këto aspirata arsimore mund të pasqyrojnë në një masë të madhe pritshmëritë familjare dhe për rrjedhojë shoqërore, për të arritur arsimin më të lartë të mundshëm.

Ndërkaq, analiza ka treguar se këto pritshmëri janë shumë problematike, sepse ato nuk pasqyrojnë domosdoshmërisht nevojat e tregut të punës apo të aftësive.

Pritshmëritë e prindërve shpesh nuk i njohin mundësitë për sa i përket pagave, karrierës dhe kënaqësisë në punë që mund të vijnë nga këshillat profesionalë.

Studimet gjurmuese mbi punët që bëjnë të diplomuarit mund të jenë një mjet i dobishëm për të udhëzuar të rinjtë që nuk kanë nisur ende studimet e larta.

Anketat e fuqisë punëtore dhe statistikat e tregut të punës janë elementë të rëndësishëm si informacion për të rinjtë në fazat e hershme të arsimit.

Të rinjtë – si në Shqipëri dhe në rajon – synojnë të mbikualifikohen në profesione elementare që nuk kërkojnë arsim të lartë të tilla si bujqësia, pylltaria, peshkimi dhe zejtaria.

Ato pëlqehen nga 60 për qind e të rinjve, të cilët gjithashtu duan të kenë një nivel të lartë shkollimi edhe pse nuk është i nevojshëm.

Shkollat në Rajon, referuar analizës, duhet të zhvillojnë kurikulat mësimore që të ndihmojnë nxënësit të kuptojnë marrëdhënien ndërmjet niveleve të arsimit, profesioneve dhe perspektivat e punës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.