60 pula ngordhin në Lushnjë – dyshohet për grip shpendësh

60 pula kanë ngordhur në një fermë në fshatin Grabian të Lushnjës. Dyshimet e para për ngordhjen e tyre është gripi i shpendëve.

Lajmi për pulat e ngordhura vjen pas një lajmi tjetër të shpërndarë në disa media se tri ditë më parë, katër pelikanë kaçurrel janë gjetur të ngordhur në Korçë. Pelikanëve u janë bërë ekzaminimet dhe kanë rezultuar pozitivë me gripin e shpendëve.

Aktualisht të gjitha grupet janë në terren për të evidentuar edhe raste të tjera nëse do të ketë.

Gripi i shpendëve në Shqipëri

Ministria e Bujqësisë e konfirmoi rastin e parë të gripit të shpendëve në Durrës, të dielën e 20 marsit.

Sipas njoftimit zyrtar, virusi është gjetur në dy stabilimente në Durrës.

“Vijojnë monitorimet dhe gjurmimet çdo ditë për kufizimin e përhapjes së sëmundjes. Është vendosur karantinimi, udhëzuar për masat e sigurisë dhe higjienës që duhet të zbatohen, janë marrë të gjitha masat për kufizimin e përhapjes së kësaj sëmundjeje duke përcaktuar perimetrin e zonës nga e cila ndalohet lëvizja e shpendëve, produkteve dhe nënprodukteve të tyre”.

Hetimi epidemiologjik deri më tani njoftohet se flet për rast të izoluar.

Autoritetet sugjerojnë që mishi i pulës të gatuhet në temperatura mbi 70°C dhe vezët po ashtu të jenë të mirëgatuara.

Gatimi i plotë i mishit dhe vezëve siguron pamundësinë e virusit për prani në produkte të papërpunuara që hyjnë në zinxhirin ushqimor.

Më 17 mars, Ministria e Bujqësisë në vijim të lajmit të një dite më parë se 200 mijë shpend kishin ngordhur në dy pulari në Durrës, njoftoi se janë marrë masat për shqyrtimin e situatës në vend, gjurmimin, kampionimin zyrtar dhe dërgimin e tyre në Institutin e Sigurisë Ushqimore dhe Veterinarisë (ISUV).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.