5 Prokurori nisin hetim ndaj Armand Dukës

Falsifikime firmash, abuzime dhe shpërdorim detyre. Janë pesë prokurori të ndryshme në Shqipëri, ato të cilat kanë nisur hetimet ndaj kreut të Federatës Shqiptare të Futbollit, Armand Duka, pas kërkesës së dy shoqatave rajonale të futbollit: Ajo e Tiranës dhe ajo e Durrësit.

Në prokuroritë e dy qyteteve më të mëdha në Shqipëri, janë depozituar kërkesa pikërisht nga këto shoqata, mbi bazën e disa kallëzimeve ndaj Dukës.

Po ashtu, drejtues të tjerë të FSHF-së janë të përfshirë në dosjet e dorëzuara.

Të gjithë ata, akuzohen për abuzime të rënda me detyrën dhe përpjekje për të manipuluar rezultatet e zgjedhjeve në këto zgjedhje, për llogari të Armand Dukës.

Sipas pretendimit nga shoqatat, lista e votuesve është fshehur. Madje, në to, janë futur edhe delegatë fiktivë, në mënyrë që mbështetësit e Dukës të shpalleshin fitues.

Rasti më i shumëpërfolur dhe më i zëshëm, ka të bëjë me zgjedhjet për Shoqatën Rajonale të Futbollit Tirana.

Në këto të fundit, Krenar Alimehmeti është shpallur fitues me 44 vota pro kundrejt 2 kundër.

Për këtë çështje, Bashkia e Tiranës, si një prej aksionereve të klubit sportiv Tirana, ka kallëzuar ngjarjen për manipulim të procesit dhe shtim fiktiv të delegatëve.

E njëjta situatë ka ndodhur edhe në Durrës, ku sipas pretendimeve, Duka ka arritur të manipulojë rezultatin dhe të caktojë njerëz të tijët si delegatë. Sërish, ka qenë Shoqata Rajona e Futbollit Durrës, ajo e cila ka dërguar dosjen në prokurori, duke pretenduar manipulimin e rezultatit.

Sakaq, një ngjarje tjetër ka ndodhur javën e shkuar, kur një delegat i Armand Dukës, Fundim Dollaku, është ndaluar nga Policia pas akuzave se ka falsifikuar firmën e kryetarit të Bashkisë Shijak, me qëllim votimin e paligjshëm të Dukës.

Ky rast, sipas burimeve të Albanian Post pranë Prokurorisë Durrës, po hetohet për të caktuar vërtetësinë e ngjarjes.

Ngjarje kjo, e cila do të dëmtonte figurën e kreut të FSHF-së, nëse vërtetohet.

Tre kallëzime të tjera, do të plotësojnë mozaikun. Do të jenë shoqatat rajonale të futbollit në Gjirokastër, Fier dhe Korçë, ato të cilat do të kallëzojnë çështje të ngjashme.

Ndërsa mandati i radhës i Dukës – i gjashti nëse e fiton – po kthehet në një betejë të vërtetë përtej futbollit.

I vetmi i cili ka zyrtarizuar kandidaturën përballë Dukës, është komentatori sportiv Dritan Shakohoxha. Veti ai duket se është i rreshtuar nga krahu i shoqatave, pasi e ka akuzuar jo pak herë Dukën publikisht për manipulim procesi.

Replika në distancë ka pasur edhe midis kryebashkiakut të Tiranës, Erion Veliaj dhe kreut të FSHF-së.

Veliaj ruan pretendimin se Duka ka shfrytëzuar për 20 vjet postim dhe ka përftuar ilegalisht nëpërmjet korrupsionit e akteve të tjera të jashtëligjshme.

Këto gjëra, Duka i mohon kategorikisht duke i lënë në spektrin e thjeshtë të akuzave.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.