5 orë takim me 12 drejtues qarqesh, Rama kërkon mobilizim për zgjedhjet vendore

Ka zgjatur pesë orë takimi mes kryeministrit shqiptar, Edi Rama dhe 12 drejtuesve socialistë të qarqeve në vend, sa i përket një plani për zgjedhjet vendore të 14 majit 2023 dhe një mobilizimi që forca politike duhet të ketë për të fituar sa më shumë bashki të jetë e mundur.

Drejtuesit e qarqeve veriore të vendit e kanë nisur raportimin e tyre e më pas, rrjedha e diskutimeve ka qenë e përqendruar për nga Tirana dhe Durrësi – dy prej bashkive më të mëdha në vend.

Pjesë e diskutimeve kanë qenë edhe bashkitë e jugut, ku ndryshimi më i madh pritet të jetë ai i Vlorës, pas krisjes që ka pasur mes kreut të selisë rozë dhe kryetarit aktual të bashkisë Vlorë, Dritan Leli.

Megjithatë, emra nuk janë bërë të ditur as pas kësaj mbledhjeje dhe kandidatët e mundshëm për vendoret e 2023-shit mbeten enigmë në kampin socialist, ku konfirmim ka pasur vetëm për Erion Veliajn, si garues dhe kërkues i një mandati të tretë për Tiranën.

Sa i përket bashkisë kryesore veriore, asaj të Shkodrës, një lëvizje e fundvitit ishte ajo e Agron Çelës, i cili nga Partia e Lirisë kaloi në Partinë Socialiste.

Kështu, me ardhjen e tij në kampin e mazhorancës, Shkodra mund të shohë një garë rivalizuese, për më tepër që e djathta shqiptare është e ndarë aktualisht dhe mund të shohë dy kandidatë në zgjedhje.

Llogaritë elektorale

Sekretari i Përgjithshëm i Partisë Socialiste, Damian Gjiknuri, bëri me dije gjatë mbylljes së vitit 2022, se të majtët e kanë një minimum bashkish, të cilat i kërkojnë t’i fitojnë me patjetër më 14 maj.

Ky numër i “artë”, është 40!

“Partia Socialiste nuk zbret nën 40 bashki. Këto janë llogaritë elektorale në Shqipëri. Për aq kohë sa nuk ka alternativë të besueshme në krahun tjetër”, ka thënë ai gjatë takimi me gazetarët në 23 dhjetor.

Gjiknuri, i pyetur se kur do të zyrtarizohen kandidatët e PS-së për zgjedhjet vendore, nënvizoi se shumë shpejt Kryesia do të miratojë një udhëzim për zgjedhjen e tyre.

Këtë, duke vijuar konsultimet me strukturat dhe jashtë strukturave.

Nga ana tjetër, ai ka kritikuar procesin e zgjedhjeve të brendshme të zhvilluara në Partinë Demokratike.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.