Nga viti 2021 e deri në qershor të 2024-së, Instituti GAP ka vlerësuar se 42 për qind e premtimeve janë përmbushur plotësisht nga kryetarët e komunave, por që për 23 për qind të premtimeve të dhëna s’është ndërmarrë asnjë nismë e pjesa tjetër u realizua pjesërisht.

Këto të dhëna janë prezantuar në një konferencë për media të premten.

Nga gjetjet e GAP-it rezulton se nga gjithsej 1 mijë e 816 premtime të dhëna nga 27 kryetarë të komunave, 765 premtime apo 42 për qind janë përmbushur plotësisht, 304 premtime apo 17 për qind konsiderohen gjysmë të përmbushura, 326 premtime apo 18 për qind janë të filluara, ndërsa 421 premtime apo 23 për qind akoma s’kanë filluar dhe s’është ndërmarrë asnjë hap për përmbushjen e tyre.

Sipas statistikave, përqindja më e lartë e premtimeve është përmbushur në fushën e administratës dhe atë të shëndetësisë me 66 për qind.

“Për dallim nga vitet e kaluara, kur përmbushja e premtimeve ishte kryesisht e fokusuar në fushën e infrastrukturës, këtë vit kjo vërehet më shumë në fushën e administratës dhe shëndetësisë”.

“Në fushën e administratës, premtimet kanë përfshirë rritjen e transparencës në vendimmarrje, publikimin e akteve komunale, përfshirjen e grave në pozita udhëheqëse, respektimin e procedurave ligjore gjatë rekrutimeve për vendet e punës dhe thjeshtimin e procesit të dokumenteve zyrtare përmes digjitalizimit”, thuhet në komunikatë për media.

Kurse më së paku 50 për qind të premtimeve të dhëna janë realizuar në fushën e arsimit, bujqësisë dhe ekonomisë.

“Në fushën e shëndetësisë, premtimet lidhen me rritjen e orarit të ofrimit të shërbimeve shëndetësore, modernizimin e pajisjeve, përmirësimin e cilësisë dhe përgjegjësisë gjatë ofrimit të shërbimeve, kontrollet specifike mjekësore për kategori të veçanta, si dhe përmirësimin e kushteve të punës dhe shërbimeve në shëndetësinë primare”.

Fushat me përmbushjen më të ulët të premtimeve kanë dalë infrastruktura, urbanizimi dhe shërbimet publike.

Nga 41 premtime të dhëna nga 27 kryetarë komunash në fushën e urbanizimit, deri më tani janë përmbushur vetëm 11.