“Dick Marty të jetë dëshmitar në Gjykatën Speciale”

Nevenka Tromp, hulumtuese për 12 vjet e Tribunalit Ndërkombëtar të Hagës për krimet e luftës në ish-Jugosllavi dhe ligjëruese në Universitetin e Amsterdamit, ka thënë se patjetër duhet që ish -senatori Dick Marty të jetë dëshmitar në Gjykatën Speciale.

“Shërbimi inteligjent i Serbisë është i shqetësuar se Dick Marty mund të ketë thënë diçka apo do të thotë diçka për këtë plan të Serbisë, e cila me dekada po përpiqet ta prezantojë se UÇK-j ka qenë organizatë kriminale dhe me këtë e kanë kriminalizuar edhe vetë luftën çlirimtare të popullit të Kosovës”, tha Tromp për RTK.

“Në një intervistë me Martyn nga mbrojta, prokuroria apo edhe gjyqtarët e Speciales, do t’i parashtroheshin të gjitha pyetjet, sepse personi i vetëm që do të jetë në gjendje t’u përgjigjet këtyre për Specialen dhe raportin e tij, është vetë Dick Marty”.

Më 1 dhjetor, në një intervistë për Albanian Post, Tromp pati thënë se krijimi i Dhomave të Specializuara të Kosovës ka qenë një nga koncesionet që është bërë ndaj Serbisë gjatë kohës së dialogut në Bruksel.

“Serbia përderisa është angazhuar në dialogun për normalizimin e marrëdhënieve me Kosovën, ka mbajtur gjithmonë agjendën e saj të fshehur. Serbia në realitet asnjëherë nuk ka qenë e gatshme të pranojë ndonjë kompromis që do të kërkonte njohjen e saj të Kosovës si shtet i pavarur. Qëllimi i Serbisë ishte ta njihte atë vetëm nëse mund ta merrte veriun e Kosovës”.

Sipas saj, “sfondi politik i krijimit të kësaj gjykate është i tillë që implikon edhe elitat qeverisëse të Kosovës në atë kohë, se si Kushtetuta e Kosovës është dashur të ndryshohet për të themeluar këtë gjykatë jashtë territorit të Kosovës”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.