30 vjet nga themelimi i Federatës së Futbollit të Kosovës

Janë bërë 30 vjet që kur u themelua Federata e Futbollit të Kosovës.

Nga themelimi mes vuajtjeve dhe vështirësive, e deri te pranimi në UEFA e FIFA, ishte rrugëtimi i FFK-së, që filloi më datë 20 gusht të vitit 1991.

Deri në kohën e shpërbërjes së Jugosllavisë, pikërisht në vitin 1991, futbolli kosovar kishte vazhdimisht katër deri në pesë klube në dy ligat federative në Jugosllavi.

Por, përkeqësimi i situatës politike reflektohej edhe në sport, pasi që ishte thuajse e pamundur të luhej më futboll, e sidomos në Kosovë.

Dhe, kjo bëri që në gusht të vitit 1991, klubi më i mirë i Kosovës, Prishtina me një traditë të ndritshme në Ligën e parë jugosllave të braktisë Ligën Profesioniste të Jugosllavisë, sepse nuk kishte më garancë për sigurinë as të lojtarëve, as të zyrtarëve të tjerë, por as të simpatizuesve kosovar.

Reagimi i pushtetit të Millosheviqit ishte histori famë keqe për sportin në Kosovë. Gjatë vitit 1991 ai përjashtoi të gjitha klubet e të gjitha sporteve dhe ua ndaloi atyre çdo aktivitet sportiv, ashtu siç bëri me punëtorët që i la në rrugë.

Të gjitha nivelet e ligave të futbollit në Kosovë u zhdukën për një ditë nga dora kriminele e pushtetit serb.

Po atë vit, pas këtij akti të pashembullt të shtetit serbo-jugosllav, futbolldashësit kosovar treguan qartë se nuk mund të jetojnë pa futboll dhe në kushte absurde për shekullin e 20-të, formuan Federatën e Futbollit të Kosovës, të pavarur nga Jugosllavia dhe me të gjitha organet e saja.

Në atë ditë kuvendi themelues i Federatës, i cili u mbajt në Shkollën Fillore “Asim Vokshi” në lagjen Kodra e Trimave në Prishtinë, me vota unanime të delegatëve, zgjodhi kryetarin e parë të FFK-së, Agim Bytyqin.

Ndeshja e parë u zhvillua në stadiumin e Flamurtarit në Prishtinë, më 13 shtator 1991, që shënoi fillimin e kampionatit të parë të pavarur të Kosovës.

Liga e parë e Kosovës numëronte 20 skuadra, ndërsa ligat tjera varësisht nga regjionet, por ndeshjet luheshin vetëm nëpër fusha të improvizuara, në kushte shumë të vështira, kurse në stadiumet e Kosovës luanin vetëm serbët, të cilët përbënin rreth tetë për qind të popullatës së Kosovës.

Maltretimet, burgosjet, rrahjet ishin të pranishme në çdo javë, por futbolli në Kosovë mbijetoi dhe u luajt deri në janar të vitit 1998, kur filloi fushata luftarake serbe ndaj popullatës civile në Kosovë.

Pas përfundimit të luftës, në vitin 1999 Federata e Futbollit të Kosovës u riorganizua, duke mbajtur kuvendin, pastaj u miratua statuti dhe u konfirmuan klubet pjesëmarrëse për edicionin e ri që do të fillonte atë kohë.

Liga e parë numëronte 18 skuadra, ndërsa liga e dytë përbëhej me dy grupe nga 14 skuadra.

Pavarësisht se qysh herët në futbollin kosovar luhej me rregulla të UEFA-s dhe FIFA-s, FFK nuk ishte anëtare e këtyre dy organizatave, pasi që anëtarësimi në to ishte i pamundur për shkak të rrethanave politike.

Kushtet e futbollit në vend, që nga viti 1999 deri te anëtarësimi i Kosovës në UEFA e FIFA, kanë qenë të vështira dhe futbolli kosovar mbijetonte vetëm falë sponsorëve vullnetarë.

Dhe, pas shumë sakrificave të shumë gjeneratave, më në fund FFK-ja në krye me legjendën tashmë të ndjerë, Fadil Vokrrin, pas shumë takimeve dhe lobimeve, arriti që t’i thyejë të gjitha barrierat dhe në maj të vitit 2016 të bëhet fillimisht anëtare e UEFA-s, e më pas edhe e FIFA-s, duke u bërë kësisoj pjesë e familjes së madhe të futbollit evropian dhe atij botëror.

Kjo periudhë vlerësohet edhe si më e rëndësishmja për zhvillimin e mëtejmë të futbollit kosovar, pasi tani përveç se Kosova merr pjesë në kualifikimet e Evropianit dhe Botërorit me kombëtaren e saj, edhe klubet po paraqiten në garat evropiane.

Pas kësaj periudhe, Kombëtarja e Kosovës, pati mjaftë suksese në arenën ndërkombëtare, duke bërë që shumë media botërore të shkruajnë për të dhe shumë qytetarë të Kosovës, të ‘çmendeshin’ nga gëzimi duke përjetuar si është të duash dhe ta përkrahësh shtetin e tyre në futboll.

Dhe tani gjithçka po shkon më së miri për futbollin kosovar, ku tashmë para pak ditësh, Kosova u bë shteti i parë në rajon që do të e futi sistemin VAR në futboll.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.