30 palestinezë të plagosur gjatë bastisjes ushtarake izraelite në Nablus

Forcat ushtarake izraelite vranë Ibrahim al-Nabulsi të martën pas një shkëmbimi zjarri. Një tjetër palestinez u vra nga të shtënat. Të paktën 30 persona të tjerë u plagosën.

Forcat IDF rrethuan shtëpinë e Ibrahim al-Nabulit ndërsa militantët e armatosur u futën brenda dhe qëlluan mbi ushtarët izraelitë. Në një video të al-Nabulsi-t që është shpërndarë në rrjetet sociale ai deklaron: “Mos i lini armët, unë jam i rrethuar dhe do të bëhem dëshmor”.

Sipas shërbimit të sigurisë Shin Bet, në vendin ku ai po qëndronte u gjet një sasi e madhe eksplozivi dhe armësh.

Al-Nabulsi, një anëtar i Brigadës së Martirëve Al-Aksa, u dyshua për disa incidente me të shtëna ndaj ushtarëve izraelitë dhe iu shmang disa përpjekjeve për arrestim në të kaluarën. Në korrik, forcat izraelite hynë në Nablus për ta arrestuar, me dyshimin se kishin qëlluar kundër ushtarëve dhe civilëve.

Ata rrethuan një shtëpi ku dyshonin se fshihej dhe qëlluan me raketa në drejtim të tij, por ai arriti të shpëtonte. Gjatë bastisjes, dy palestinezë u vranë. Sipas policisë, ata së bashku me militantët e tjerë kanë qëlluar në drejtim të forcave izraelite.

Brigadat e Martirëve Al-Aksa, krahu ushtarak i Fatahut, deklaruan se burrat, Muhammad Al-Azizi, 25 vjeç dhe Abed al-Rahman Sobah, 28 vjeç, ishin anëtarë të grupit. Mijëra, duke përfshirë qindra burra të armatosur dhe al-Nabulsi, morën pjesë në varrimin e dy burrave në Nablus.

Drejtori i spitalit Rafidia të Nablusit konfirmoi se po trajton njëzet të plagosurit që u plagosën nga shkëmbimi i zjarrit, njëri prej tyre në gjendje kritike. Gjysmëhëna e Kuqe tha se po trajton 30 të plagosur, shumica e të cilëve janë në gjendje mesatare deri në të rëndë.

Javën e kaluar, ushtria izraelite dhe policia kufitare arrestuan Bassam al-Saadi, një anëtar i lartë i Xhihadit Islamik në qytetin Jenin të Bregut Perëndimor. Pas arrestimit të tij, u vendosën kufizime për banorët e enklavës së Rripit të Gazës për katër ditë nga frika e hakmarrjes nga Xhihadi Islamik në Gaza.

Të premten, ushtria izraelite nisi operacionin Breaking Dawn, i cili filloi me vrasjen e Tayseer al-Jabri, komandantit të krahut ushtarak të Xhihadit Islamik në veri të Rripit të Gazës dhe mbikëqyrte grupin antitank të grupit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.