Lajme

30 ditë paraburgim ndaj njërit prej të dyshuarve për krime lufte në Kosovë


Gjykata Themelore në Prishtinë.

Gjykata Themelore në Prishtinë, ka vendosur që të caktoj masën prej 30 ditë paraburgim ndaj të pandehurit me inicialet Sh.L i cili dyshohet për krime lufte në Kosovë.

Lajmin e ka bërë të ditur përmes një komunikate për media Gjykata Themelore në Prishtinë.

“Ai dyshohet për veprën penale Krim i luftës kundër popullatës civile, e sanksionuar me nenin 142 lidhur me nenin 22 të Ligjit Penal të Republikës Socialiste Federative të Jugosllavisë ( tutje “LP-RSFJ”) si ligji në fuqi në kohën e kryerjes së veprës penale”.

Siç njoftohet, gjyqtari i Procedurës Paraprake e ka aprovuar si të bazuar kërkesën e Prokurorisë Speciale të Republikës së Kosovës, për caktimin e masës së paraburgimit kundër të pandehurit SH.L dhe të njëjtit i caktoi masën e paraburgimit në kohëzgjatje prej 1 (një) muaji.

“Të pandehurit SH.L i është caktuar masa e paraburgimit në harmoni me nenin 184 paragrafi I nën paragrafi 1.1 dhe 1.2, pika 1.2.1 dhe 1.2.2 të KPPRK-së, për shkak të dyshimit të bazuar se ka kryer veprën penale Krim i luftës kundër popullatës civile”.

Ndërsa, kundër këtij aktvendimi, palët e pakënaqura është thënë se kanë të drejtë ankese në Gjykatën e Apelit, përmes Gjykatës Themelore në Prishtinë.

Edhe më 14 shtator, Prokuroria Speciale e Republikës së Kosovës kishte ngritur aktakuzë kundër dy të pandehurve serbë me inicialet I.R dhe D.D, për veprën penale të dhunimit seksual, gjatë luftës në Kosovë.

Në luftën e zhvilluar në Kosovë më 1998/99, janë vrarë mbi 13 mijë persona dhe mijëra të tjerë janë zhdukur.

Mbi 1 mijë e 600 persona vazhdojnë të jenë ende të pagjetur – pjesa më e madhe e tyre shqiptarë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore