3 pikat e Ramës për shmangien e krizës energjetike

Kryeministri i Shqipërisë, Edi Rama, të shtunën e 9 tetorit në një konferencë të jashtëzakonshme prezantoi planin e qeverisë për përballimin e krizës energjetike.

Kreu i qeverisë shqiptare bëri me dije se plani do të fokusohet në tre pika. E para kishte të bënte me garantimin dhe furnizimin pa ndërprerje të energjisë elektrike.

E dyta do të fokusohet te mbrojtja e familjes dhe biznesit të vogël. Dhe e fundit, jo më pak e rëndësishme, kishte të bënte me garantimin e fondit likuid.

Për sa i përket pikës së dytë, Kryeministri Rama theksoi faktin se plani nuk parashikon rritjen e çmimit të energjisë për konsumatorët familjarë dhe biznesin e vogël.

Nga ana tjetër fondi likuid për ndërveprimin me tregun e energjisë elektrike, Rama deklaroi se do të sigurojë dy pikat e para.

“Ky instrument do të jetë i ripërtëritshëm me vlerë 100 milionë euro deri në fund të këtij viti dhe 100 të tjera për vitin e ardhshëm”.

Gjatë fjalimit, numri një i qeverisë tha se, sipas konsultimeve me ekspertë ndërkombëtarë dhe kombëtarë, kjo krizë do të jetë në qarkullim deri në pranverën e vitit të ardhshëm. Prandaj ky plan është ndërtuar për të mbuluar këtë periudhë kohore.

Më tej, ai bëri me dije se do të ulet në një tryezë të përbashkët me qytetarët.

“Konsultim kombëtar brenda këtij viti me të gjithë qytetarët, për të dëgjuar njëri-tjetrin dhe për të zgjedhur zgjidhjen më të mirë të mundshme së bashku”, tha Rama.

Në përfundim Kryeministri dha një mesazh të qartë se “kriza është reale”.

Duke përmendur pandeminë dhe tërmetin në vitin 2019, Rama e mbylli se, “do ja dalim gjithnjë e më mirë. Mos e harroni se, atë çfarë ndjeni sot me vendimet tona – do të korrin fëmijët tanë nesër”.

Çfarë tha më tej Kryeministri?

Rama e nisi fjalimin duke bërë një pasqyrë të çmimeve dhe pagave ndër vite duke i krahasur dhe me vendet e rajonit.

Sipas tij në nivel rajonal pagat në Shqipëri janë më të larta.

Synimi i qeverisë, sipas Ramës, është mbrojtja e konsumatorit, sidomos familjet në nevojë dhe biznesi i vogël.

Përballë kësaj krize, sipas Ramës, nuk mund të jetë synim i qeverisë rritja e pensioneve apo e pagës minimale. Kjo pasi shteti do të falimentonte brenda dy vitesh.

Më tej shtoi se në fakt ,“çmimi ynë i energjisë elektrike nuk është real, por është i kontrolluar nga shteti për mbrojtjen e konsumatorit”.

Sipas tij me reformën e energjisë të ndërmarrë në vitin 2015, çmimi i energjisë u ul nën 9.5 lekë.

“Ky është një çmim nën koston e prodhimit, që është mbajtur i palëvizur për të mos lënduar askënd”.

Përveç kësaj, Rama tha se që nga marrja e mandatit të parë – në vitin 2013 – rroga e deputetëve dhe ministrave nuk është arritur. Ndërsa theksoi faktin se tatimi i pagës për ta është rritur.

“Paga ime tatohej më pak se e sanitareve. Ulëm taksat për bizneset e vogla dhe e rritëm për të mëdhenjtë”, ravijëzoi Kryeministri.

Kriza energjetike

Të premten e 8 tetorit, kryeministri shpalli gjithashtu vendimin e Këshillit e Ministrave për shpalljen e gjendjes së emergjencës energjetike në Shqipëri. Kjo, për shkak të situatës së krijuar edhe në tregjet botërore.

VKM-ja zbuloi se do të ngrihet një grup ndërinstitucional për menaxhimin e emergjencës. Ajo do të drejtohet nga zëvendëskryeministri, Arben Ahmetaj.

Në përbërje të saj do të jetë ministrja e Infrastrukturës dhe Energjisë, Belinda Balluku dhe ministrja e Financave dhe Ekonomisë, Delina Ibrahimaj.

Ndër të tjera, VKM-ja thekson se shoqëritë energjetike “KESH”, sh.a., “OST”, sh.a., dhe “OSHEE Group”, duhet të pezullojnë planet e tyre të investimeve.

VKM-ja e fundit ngarkon, sakaq, ministren Ibrahimaj që të sigurojë mekanizmat e duhur financiarë.

Këto mekanizma, do të mundësojnë importin e energjisë – për sigurimin e furnizimit të pandërprerë me energji elektrike.

Kjo gjendje do të shtrijë efektet e saj deri më 15 prill të vitit 2022.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.