3.9 % do të jetë rritja ekonomike në vend, sipas BQK-së  

Banka Qendrore e Kosovës bazuar në projeksionet e saja ka vlerësuar se për vitin 2024 rritja ekonomike në vend do të jetë prej 3.9 për qind.

Kjo rritje, sipas BQK-së, vije si rezultati i të ardhurave reale të disponueshme, për shkak të rënies së inflacionit dhe rritjes së burimeve të tjera të financimit.

BQK në raportin “Vlerësimi Tremujor i Ekonomisë” shkruan se në Tre Mujorin e parë (TM1) të këtij viti është shënuar ngadalësim i rritjes prej 3.3 për qind, si pasojë e vlerësimeve për rënie të eksportit të mallrave si dhe rritjes së importit të mallrave dhe shërbimeve.

Përderisa është vlerësuar se investimet e përgjithshme, konsumi, si dhe eksporti i shërbimeve, se kanë ndikuar pozitivisht rritjen e Bruto Produktit Vendor.

Në këtë raport BQK ka parashikuar se inflacioni në vend do të ngadalësohet në 2.5 për qind.

“Faktorët që pritet të kontribuojnë në këto dinamika përfshijnë stabilizimin e ofertës dhe çmimeve në tregjet ndërkombëtare krahas ngadalësimit të aktivitetit ekonomik global, trendin zbritës të inflacionit në eurozone, transmetimin e shtrëngimit të kushteve të financimit në kërkesën e brendshme, e të tjera”, thuhet në raport.

Po ashtu në raport flitet për rreziqet e ndërlidhura me inflacionin që anojnë nga kahu i lartë dhe që kryesisht përbëhen nga rreziqet për pengesa në zinxhirët e furnizimit si pasojë e tensioneve gjeopolitike, reduktimin e sasisë së prodhimit nga OPEC+, ndikimin e migrimit potencial në paga pas liberalizimit të vizave, e të tjera.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.