“Është rrahur për vdekje”, tregojnë për Albanian Post, burime brenda Institutit të Mjekësisë Ligjore në Kosovë, për rastin e M.O, 18-vjeçe, e cila u la pa shenja jete në Emergjencën e Ferizajt të dielën rreth orës 15:00.
Obduksioni i trupit të pajetë të 18-vjeçares, “mund të përfundojë sot dhe t’i dorëzohet familjes”, ndërsa raporti u dorëzohet organeve hetuese të Prokurorisë.
Dardan Krivaqa, 29-vjeçari nga Ferizaj, është në arrati dhe po kërkohet nga Policia e Kosovës si i dyshuari kryesor për vrasjen e M.O, bashkë me A.S, 32 vjeç. Ky i fundit ka rënë në duar të policisë dhe i është caktuar masa e paraburgimit deri në fillim të procedurave ndaj tij me vendim të prokurorit të rastit.
Zëdhënësja e Prokurorisë Themelore në Ferizaj, Vjosa Baftiu, përmes postës elektronike, për Albanian Post ka treguar se i dyshuari Krivaqa është recidivist i disa veprave penale.
“Pas verifikimit në regjistrat tanë, personi në fjalë (D.K) është recidivist i veprave të ndryshme penale si ‘Vjedhje e rëndë’, ‘Lëndim i lehtë trupor’, ‘Kanosje’, ‘Lëndim i rëndë trupor’, të Kodit Penal të Republikës së Kosovës (KPRK)”, pa dhënë më shumë detaje rreth kryerjes së këtyre veprave penale, përfshirë edhe kohën kurë kanë ndodhur rastet.
Edhe punëtorëve të Qendrës për Punë Sociale në Ferizaj, u ka dalë punë me të dyshuarin për vrasje tash, Dardan Krivaqa.
Pasi që në vitin 2007, ai kishte qenë i mitur kur kishte kryer veprën penale “vjedhje e rëndë”.
“Ky rast na është përcjellë nga Gjykata Themelore në Ferizaj dhe ne si qendër i kemi ofruar këshillime psikosociale, vizita në familje, intervenime që na lejohen me kompetencat që kemi”, tha për Albanian Post drejtoresha e QPS në Ferizaj, Adelina Regjepi Braha.
I lindur në vitin 1992, Dardan Krivaqa ka ndjekur mësimet në shkollën fillore “Gjon Serreçi”.
Gjatë gjithë periudhës së shkollimit fillor, ai “ka qenë djalë problematik”, tregojnë ish-shokët e klasës së tij, për Albanian Post, pa treguar identitetin, për shkak të “frikës nga hakmarrja”.
“Shumë shpesh kanë ardhur policia në shkollë për shkak të tij, ka mbajt thikë e na tutke edhe në shkollë”, vazhdon më tej rrëfimin i riu nga Ferizaj.
“Edhe çikat i ka ngucë gjithë, tip problem. Pas një kohe kemi dëgjuar që ka shkuar në Francë, atje e ka një vëlla, nuk e di saktë kur ka shkuar”, përfundon rrëfimin e shkurtër një ish nxënës i klasës së Dardan Krivaqës.
Policia rajonale e Ferizajt ka shpërndarë gjithandej fotografitë e 29-vjeçarit Dardan Krivaqa, duke kërkuar nga të gjithë qytetarët që të ndihmojnë në gjetjen dhe identifikimin e tij.
Pas publikimit të këtij rasti, ka reaguar ministrja e Drejtësisë, Albulena Haxhiu.
“T’i trajtojnë me prioritet e me seriozitetin maksimal rastet e dhunimit, kurse dhunuesit të vihen përballë drejtësisë”, ka thënë ajo duke shtuar se inkurajimit të qytetarëve për të raportuar dhunën, “duhet t’i përgjigjemi me veprime konkrete, në gjetjen e dhunuesve dhe sjelljen e tyre përpara drejtësisë”, ka shkruar ndër të tjera ministrja Haxhiu.
Gjatë ditës së hënë, për këtë rast reaguan edhe disa gra të tjera me pozita të ndryshme në institucione dhe organizata jo qeveritare, të cilat mbrojnë të drejtat e grave në Kosovë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
