Gjatë 24 orëve të fundit 13 persona kanë humbur betejën me coronavirusin dhe kanë rezultuar pozitivë 1 mijë e 184 qytetarë në Shqipëri.
Sipas njoftimit zyrtar të Ministrisë së Shëndetësisë dhe Mbrojtjes Sociale (MSHMS), tetë qytetarë janë nga Tirana, dy nga Elbasani, një nga Gramshi, një nga Berati dhe një nga Lushnja. Këta persona i përkasin grupmoshës 48-81 vjeç.
Ditën e sotme janë vaksinuar 822 qytetarë.
Aktualisht në spitalet COVID në Tiranë dhe në spitalet rajonale janë duke u trajtuar 632 pacientë, 40 në terapi intensive nga të cilët 14 pacientë janë të intubuar.
Janë kryer 4 mijë e 13 testime dhe janë shëruar 796 qytetarë.
Kujtojmë se të mërkurën ministrja, Ogerta Manastirliu, ka deklaruar se janë marrë masa të reja duke u vendosur ora policore 20:00-06:00. Kjo masë u shoqërua edhe me rritjen e gjobave për personat apo subjektet që shkelin ligjin.
Prandaj, Ministria ka bërë sërish apel që të vendoset maska, të shmangen grumbullimet, të ruhet distanca dhe të tregohet kujdes për higjienën vetjake.
Albanianpost.com
