![](https://albanianpost.com/wp-content/uploads/2022/07/ujirubineti-750x500-1-1.jpg)
Kryetari i Komunës së Hanit të Elezit, Mehmet Ballazhi, ka bërë të ditur për Albanian Post se rreth 100 persona dyshohet se janë helmuar nga uji i pijshëm në këtë komunë.
Ai në një bisedë për Albanian Post ka theksuar simptomat me të cilat janë paraqitur banorët.
“Që nga dita e djeshme kane filluar te vijnë të dyshuar nga helmimi në QKMF të marrin ndihmën e parë për shkak të simptomave të vjelljes, të barkqitjes dhe temperaturës e që thonë se ky është helmim. Helmimi dyshohet se mund të ketë ardhur nga uji, megjithatë nuk ka ende ndonjë analizë se nga saktësisht vjen ky helmim”, ka thënë ai.
Ndërkaq, ka thënë se për rastin është njoftuar Instituti Kombëtar i Shëndetësisë Publike të Kosovës, zyrtarët e të cilit sipas tij, ende nuk i kanë marrë mostrat për të bërë analiza.
![](https://albanianpost.com/wp-content/uploads/2021/07/215847287_4100614856696616_1868895110121300802_n.jpg)
“IKSHPK-ja është i njoftuar, janë rrugës për të marrë mostrat në fshatin Gorancë për të bërë analizat dhe për të parë se çka në fakt është duke ndodhur. Deri para rreth një ore diku rreth 100 persona kanë kërkuar ndihmë, vinë herë pas here persona por jo në mënyrë masive, ka rënë numri siç ka qenë nga dita e djeshme në orët e vona të mbrëmjes”.
Më 7 korrik, edhe në komunën e Kaçanikut është dyshuar për helmim nga uji i pijes.
Lajmin për Albanian Post e kishte konfirmuar kryetari i kësaj komune, Besim Ilazi.
“Përafërsisht përmes rezultatit që marrim nga QKMF-ja në Kaçanik dikund rreth 50 pacientë deri në 70 kanë kërkuar ndihmën mjekësore”, ka thënë Ilazi për AP.
Ndryshe, me 14 korrik, komuna e Deçanit në Kosovë kishte shpallur gjendje emergjente në gjithë territorin e Komunës së Deçanit, pas qindra rasteve të qytetarëve që ishin helmuar nga uji i pijshëm.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com