Lajme

10 muaj punë për të krijuar kurorën me gjemba të Kendrick Lamar


Reperi me famë botërore Kendrick Lamar, gjatë një performance në Glastonbury – në të cilën nuk mungoi as deklarata e fuqishme në mbështetje të të drejtave të grave për çështjen e abortit – kishte vënë në kokë një kurorë prej titani dhe diamantesh e dizajnuar nga Tiffany & Co.

U deshën 10 muaj punë dhe katër nga artizanët e më të aftë të Tiffany & Co që kurora të përfundonte.

Në një deklaratë të shpërndarë të hënën, Dave Free, i cili shërben si Zëvendës Ekzekutiv i Produktit dhe Komunikimit në Tiffany, tha se ekipi ishte “krenar dhe tepër i emocionuar” që ishte angazhuar për të ndihmuar në realizimin e këtij vizioni.

Sipas një njoftimi për shtyp, modeli prej titani i kurorës (e cila peshon rreth 200 gram) u ndërtua duke përdorur 14 përbërës individualë që u bashkuan në një pjesë të vetme përfundimtare. Më shumë se 8 mijë diamante me një total prej 150 karatësh janë përdorur në përpunimin e pjesës me porosi, të cilat veshin 50 gjemba në forma të ndryshme.

Kohët e fundit, simbolika pas kurorës, ka qenë një fiksim për fituesin e çmimit Pulitzer. Më e rëndësishmja, ai është parë duke mbajtur kurorën e gjembave në kopertinën e albumit të tij të publikuar në maj, “Mr. Morale & the Big Steppers”.

Kopertina e albumit “Mr. Morale & the Big Steppers”

Revista e muzikës hip-hop “Complex” e ka cilësuar albumin e fundit të Kendrick Lamar “Mr. Morale & the Big Steppers”, një nga albumet më të mira të vitit (deri tani).

/Albanianpost.com


Lajmet kryesore