10 barnatore të Prishtinës për herë të parë kujdestarojnë nga tetori

Kuvendi Komunal i Prishtinës, të hënën ka miratuar vendimin që 10 barnatore të kryeqytetit të kenë kujdestari me orar të plotë 24 orësh.

Lajmi është bërë i ditur përmes një komunikate për media nga komuna e Prishtinës.

“Me shumicë votash të këshilltarëve komunal të Kuvendit të Kryeqytetit, është miratuar ndryshim, plotësimi i rregullores për fillimin dhe mbarimin e orarit të punës së organizatave të biznesit në kryeqytet”.

“Orari i kujdestarisë së natës për barnatore është prej orës 21:00 deri në 07:00, kujdestarojnë 5 (pesë) barnatore në gjithë Kryeqytetin”.

Ky ndryshim nga komuna është thënë se do të vij nga muaji tetor.

“Në këtë ndryshim sqarohet se nga Tetori, në 10 (dhjetë) barnatore të kryeqytetit do të ketë kujdestari me orar të plotë (24 orë) nga ora 07:00 deri në 07:00”.

Në rast të mosrespektimit të këtij vendimi nga komuna është thënë se do të ketë gjobë deri në 3 mijë euro.

“Gjobiten me nga 300 deri në 1000 Euro personi fizik dhe nga 1000 deri në 3000 Euro personi juridik, nëse nuk i përmbahen orarit të përcaktuar”.

Në komunën e Prishtinës, deri tani nuk ka pasur barnatore të cilat kanë funksionuar 24 orë dhe të cilat janë caktuar nga komuna.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.