“1 mijë e 500 shtatzëna u larguan nga puna në vitin 2021”

Aktivistë të organizatës jo qeveritare “Kolektivi për Mendim dhe Veprim Feminist”, të shtunën kanë shënuar disa grafitë në pjesë të ndryshme të mureve të Prishtinës.

Kjo, duke shprehur pakënaqësitë e tyre, si një lloj proteste ndaj institucioneve të Kosovës, që nuk po mbrojnë gratë e punësuara në sektorin privat.

Sipas të dhënave të mbledhura nga kjo organizatë vetëm gjatë vitit 2021, rreth një mijë e 500 gra shtatzëna janë larguar nga puna.

Po ashtu, ata thonë se fajet për këtë i kanë të gjitha institucionet publike në Kosovë.

“Atë që nuk arritëm ta mbaronim mbrëmë në ndërtesën e Qeverisë për shkak të ndërhyrjes brutale të Policisë, e përfunduam sonte në institucionet tjera”, shkruan në njoftimin e Kolektivi për Mendim dhe Veprim Feminist.

“Dhuna ekonomike ndaj grave e cila veç sa është duke u shtuar përgjatë pandemisë, për fajtorë ka të gjitha institucionet publike. Ato në vend të mbrojtjes së punëtoreve/ëve, po rreshtohen në anën e privatnikut”.

“Largimi nga puna i 1 500 grave shtatzëna nga puna përgjatë vitit 2021 është veç alarm i cili po tregon për shtypjen e shumëfishtë që grave iu bëhet në tregun e punës. E ky alarm përveç shpërfaqjes së dhunës sistematike ndaj grave, thërret në organizim e revoltë të grave punëtore, me apo pa kontratë pune”.

“Nga çdo hapësirë, ne i themi shtetit që ne duam punë, siguri e mirëqenie, jo subvencionim të riprodhimit”, thuhet në komunikatën e tyre.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.